Germanııa úsh atom elektr stansasyn japty

NUR-SULTAN. QazAqparat - Jyldyń sońyna qaraı Germanııada ıadrolyq energııadan bas tartýdyń jańa kezeńine ótti. 31 jeltoqsanda eldiń soltústiginde ornalasqan Brokdorf atom elektr stantsııasyn qosa alǵanda, úsh atom elektr stansasy óshirildi, dep habarlaıdy QazAqparat Euronews-ke silteme jasap.

Germanııadaǵy atom elektr stansalarynyń jumysyn toqtatý týraly sheshim 2011 jyly Japonııanyń Fýkýsıma atom elektr stansasyndaǵy apattan keıin qabyldanǵan bolatyn. Býndestagta daýys berý kezinde bul bastamany 600 depýtattyń 513-i qoldady. Eń eski reaktorlar birden toqtatyldy, al qalǵan toǵyzyn kezeń-kezeńimen jabý týraly sheshim qabyldandy.
Bıyl elektr qýatyn óndirýdi toqtatatyn Bavarııa, Tómengi Saksonııa jáne Shlezvıg-Golshteınde ornalasqan úsh atom elektr stansasynan keıin qalǵan úsh atom elektr stansasy kelesi jyldyń sońyna deıin jabylady.
AES-ti toqtatýǵa baılanysty jumystar taǵy birneshe jyl jalǵasady. Bul rette el jańartylǵan energııa kózderine kóbirek kóshýdi josparlap otyr. 2030 jylǵa qaraı elektr energııasynyń 80%-y jel týrbınalary, kún batareıalary nemese bıogaz qondyrǵylary arqyly óndiriledi dep boljanýda.