Germanııa senbi kúni sońǵy AES jumysyn toqtatpaqshy

BERLIN. QazAqparat – Senbi kúni Germanııa qalǵan barlyq atom elektr stantsııalarynyń jumysyn tolyq toqtatýdy josparlap otyr. Másele úsh energoblok týrasynda bolyp otyr. Bul týraly QazAqparat Euronews-ke silteme jasap habarlaıdy.

Jospar boıynsha, olar byltyr jyl sońynda jabylýy kerek edi. Biraq Ýkraınadaǵy jaǵdaı men sodan bolǵan energetıkalyq daǵdarys bul qadamdy keıinge shegerýge májbúr etti. Sol kezde sońǵy reaktorlardy qaldyryp qana qoımaı, jumysy toqtaǵandaryn qaıta iske qosý kerektigi de aıtyldy. Alaıda úkimet «atom energetıkasynyń uzaqmerzimdi qaýip-qaterin baqylaý múmkin» emestigin alǵa tartty.

«Bólshekteý tsehynda biz negizgi bólikterdi, ıaǵnı bý generatorlary men reaktorlardyń biteý korpýstaryn bólshekteımiz jáne bul ispen 40-shy, tipti 50-shi jyldarǵa deıin aınalysamyz. Al bólshekteý tsehynyń ózin bólshekteý 60-shy jyldarǵa josparlanǵan», - dep atap ótti AES ýtılızatsııasymen aınalysatyn kompanııa ókili Kýrt Radloff.
Saýalnama boıynsha, nemisterdiń tórtten birinen sál ǵana asqan bóligi AES-ten bas tartýdy qoldaǵan. Úshten ekisi atom energetıkasyn saqtap qalýdy nemese kem degende, reaktorlardy paıdalaný merzimin uzartýdy qoldap daýys bergen. Stantsııa jabylýyna qarsy shyǵýshylar keltirgen argýmentterdiń biri – qurylǵylar men ıadrolyq qaldyqtardy joıý quny tym joǵary.