Germanııa Prezıdentine Quryq porty men kólik-logıstıka salasyndaǵy jobalar tanystyryldy
Quryq porty Kaspıı teńiziniń shyǵys jaǵalaýynda, Aqtaý teńiz saýda portynyń ońtústiginde ornalasqan. Búgingi tańda onyń óndiristik qýaty jylyna 6 mln tonna júkti quraıdy. Negizinen parom kesheni arqyly qazaqstandyq eksporttyq jáne tranzıttik júkter ótedi. Qazirgi ýaqytta port ınfraqurylymyn keńeıtý jáne onyń aýystyryp tıeý qýatyn arttyrý boıynsha jumystar júrgizilip jatyr.
Delegatsııa Quryq aýmaǵyn aralap, paromdardyń birinde ekskýrsııa jasady. Sonymen qatar Frank-Valter Shtaınmaıer men Álıhan Smaıylovqa perspektıvaly ınvestıtsııalyq jobalar, sonyń ishinde «Sarja» kópfýnktsıonaldy teńiz termınalynyń jobasy tanystyrylyp, porttyń aǵymdaǵy jumysy týraly baıandamalar usynyldy.
Búginde Qytaı men Ortalyq Azııadan Eýropaǵa tasymaldanatyn júkterdiń 80%-dan astamy Qazaqstan arqyly tasymaldanady. Osyǵan baılanysty Ortalyq jáne Shyǵys Azııadan Eýropaǵa tasymaldaýdyń eń qysqa joly – kontınenttik saýda kartasynda Orta dáliz retinde belgili Transkaspıı halyqaralyq kólik baǵytynyń mańyzy arta túsýde. Ótken jyly THKB arqyly júkterdi aýystyryp tıeý eki esege artyp, shamamen 1,7 mln tonnany qurady. Osy jyldyń 5 aıynda júk tasymaly 64%-ǵa ósip, 1 mln tonnadan asty.
Qazaqstan osy baǵyt boıynsha júk tasymaldaý kólemin keleshekte 10 mln tonnaǵa deıin jetkizýge múddeli, sondaı-aq nemis jáne eýropalyq seriktesterdiń qajettilikterin qamtamasyz etý óz port qyzmetteriniń múmkindikterin usynýǵa daıyn. Búginde Aqtaý jáne Quryq porttarynyń ótkizý qabileti 20 mln tonnadan asady. Sonymen qatar Úkimet syrtqy logıstıkalyq termınaldar qurý jáne marshrýttardy tsıfrlandyrý boıynsha jumys júrgizýde.
Óz tarapynan nemis seriktester perspektıvaly kólik-logıstıkalyq jobalardy júzege asyrýǵa qyzyǵýshylyq tanytyp otyr.