Germanııa Prezıdenti erteń Aqtaýǵa barady
Memleket basshysy jıynda mańyzdy baǵyttyń biri – adamı kapıtal salasyndaǵy yntymaqtastyq ekenin alǵa tartty.
«Bilim berý, biliktilikti arttyrý jáne bilim transferti mańyzdy sala sanalady. Bul baǵyttardy meńgermeı, básekege qabiletti bolý múmkin emes. Osy rette Shtaınmaıer myrzanyń erteń Aqtaý qalasyna sapary kezinde Kaspıı memlekettik ýnıversıteti janynan Qazaq-nemis ınjınırıng ınstıtýtynyń ashylýyn quptaımyn», - dedi Qasym-Jomart Toqaev.
Sonymen qatar ol Shyǵys Qazaqstan tehnıkalyq ýnıversıtetiniń janyndaǵy Qazaq-nemis ǵylym jáne tehnologııalar ınstıtýty osy mańyzdy ındýstrııalyq óńirdegi adamı kapıtal men básekege qabilettilikti odan ári jetildirýge yqpal etetinin jetkizdi.
«Bul ınstıtýttar ozyq logıstıka, jasyl sýtegi jáne jańartylatyn tehnologııalar úshin asa qajet paıdaly qazbalar óndirý sekildi negizgi salalar boıynsha mamandar daıarlaıdy. Túlekter Qazaqstan men Germanııa dıplomyn qatar alady. Bul – eki el seriktestiginiń taǵy bir mańyzdy kezeńi. Bolashaq túlekterdi jumysqa alatyn Germanııa kásipkerleri elimizde ózin erkin sezinedi dep úmittenemiz», - dedi Prezıdent.