Germanııa mamandary qysta jylýdy únemdeýge shaqyrdy

ASTANA. QazAqparat - Germanııadaǵy gaz qoımalary jaqsy toltyrylǵanymen, qys mezgilinde eldi energııamen qamtamasyz etýde qaýip basym. Sol sebepti nemis mamandary halyqty qys maýsymynda elektr energııasyn únemdeýge shaqyrdy, dep habarlaıdy QazAqparat DW agenttigine silteme jasap.

Federaldy jeli agenttiginiń (Bundesnetzagentur, BNetzA) basshysy Klaýs Mıýller bıylǵy qysta Germanııanyń gaz jetkizýine qaýip tónetinin eskertip, azamattardy energııany únemdeýge shaqyrdy.

«Saqtaý qoımalary 94 paıyzǵa toly jáne bizde balamaly jetkizý kózderi bar. Sondyqtan kelesi qysqa optımıstik kózqaraspen qaraı alamyz. Biraq olaı aıtýǵa erte, qater áli de saqtalady», - dedi ol.

Mıýller Reseı áli kúnge deıin Ońtústik-Shyǵys Eýropaǵa gaz jetkizýdi jalǵastyratynyn atap ótti.

«Alaıda, bul jetkizilim toqtasa, mundaı elder basqa kózderden gaz jetkizilimin qajet etedi. Ondaı jaǵdaıda Germanııa mańyzdy ról atqarady», - dedi sheneýnik.

Ol úı ıeleri men jalǵa alýshylardy «qysqa barynsha daıyndalýǵa» shaqyrdy.

Mysaly, olar gazdy jylytýdy ońtaıly retteýi kerek.

«Gaz daǵdarys aldyndaǵy kezeńnen aıtarlyqtaı qymbat, - dedi Mıýller. – Gazdy únemdeý - aqsha únemdep, klımatty jaqsartýǵa ǵana emes, sonymen birge senimdi jetkizýdi qamtamasyz etýge kómektesedi».