Germanııa kontslagerinde qaza tapqan 927 qazaqstandyq jaýyngerdiń jaqyndary izdestirilýde

NUR-SULTAN. QazAqparat – ІІ Dúnıejúzilik soǵys kezinde Germanııadaǵy kontslagerlerde qaza bolǵan 927 otandasymyzdyń tizimi tabyldy. Búginde olardyń týystaryn izdestirý jumysy júrip jatyr. Bul týraly QR Qorǵanys mınıstriniń orynbasary Tımýr Dandybaev málim etti, dep habarlaıdy QazAqparat tilshisi.

«Vozvraşenıe ımenı» halyqaralyq patrıottyq uıymy bizge soǵys kezinde Germanııadaǵy kontslagerlerde qaza tapqan 927 qazaqstandyq jaýyngerdiń tizimin berdi. Qazirgi ýaqytta qaza tapqandardyń týystaryn anyqtaý boıynsha jumystar júrip jatyr. Sondaı-aq, bizdiń mınıstrlik ókilderi bıyl 8 mamyrda «Platsdarm» qoǵamdyq uıymynyń shaqyrýymen Ýkraınaǵa baryp, Slavıansk úshin shaıqasta qaza tapqan 99 jaýyngerdiń, onyń ishinde jerlesimiz - leıtenant Úkibaı Bazarbaıdyń súıekterin qaıta jerleý rásimine qatysty. Odan bólek, qazirgi ýaqytta reseılik izdeý toby bizdiń 12 jerlesimizdiń dene qaldyqtaryna saraptama júrgizýde, keıin olar bizge beriledi», - dedi Tımýr Dandybaev.

Buǵan deıin QR Qorǵanys mınıstriniń orynbasary ІІ Dúnıejúzilik soǵysta habar-osharsyz ketken 7 otandasymyzdyń máıiti tabylǵanyn aıtty.

Onyń málimdeýinshe, joǵalǵandardyń aty-jónderi anyqtalyp, elge jetkizilgen.

Aıta keteıik, búgin elordada Uly Otan soǵysynyń 80 jyldyǵyna arnalǵan «Álemdi qorǵaǵandardy este saqtaý, aqıqatty jetkizý» atty halyqaralyq konferentsııa ótip jatyr.

Shara «Atamnyn Amanaty» qoǵamdyq birlestigi «Reseıdiń izdeý qozǵalysy» jalpyreseılik qoǵamdyq qozǵalysymen birlesip, Prezıdenttik granttar qorynyń qoldaýymen uıymdastyrylyp otyr.