Germanııa Qazaqstannyń halyqaralyq máselelerdegi ustanymyn qoldaıdy - Annalena Berbok

ASTANA. QazAqparat – Germanııa Qazaqstanmen arada ekonomıkalyq qarym-qatynastardy nyǵaıtýǵa basymdyq berip otyr. Bul týraly elordada Germanııanyń Federaldyq Syrtqy ister mınıstri Annalena Berbok aıtty, dep habarlaıdy QazAqparat tilshisi.

«Qazaqstan halyqaralyq tártipti qoldaıtynyn jáne ortaq kúsh-jigermen osy tártipti saqtaý úshin barlyǵyn istep jatqanyn jıi aıtyp júr. Qazaqstan osyndaı kúrdeli jaǵdaıda aıqyn pozıtsııany ustanyp keledi. Sondyqtan Germanııa jaǵy bul ustanymǵa qurmetpen qaraıdy», - dedi A. Berbok Qazaqstan Premer-Mınıstriniń orynbasary – Syrtqy ister mınıstri Muhtar Tileýberdimen kezdesýden keıin ótken brıfıngide.

Onyń paıymynsha, qazir álem elderi ózderiniń yqpalyn keńeıtýge tyrysyp jatyr. Osy oraıda ekonomıkalyq kelisimsharttar arqyly baılanystar nyǵaıyp keledi.

«Germanııa ádil ári teń dárejede, eshqandaı májbúrleýsiz, jasyryn sharttarsyz bekitilgen ekonomıkalyq qarym-qatynastar bolǵanyn qalaıdy», - dedi mınıstr.

Sonymen qatar ol Qazaqstanda taza ári ekologııalyq tıimdi «jasyl» sýtegi shyǵaratyn álemdegi eń iri kásiporyndardyń birin salý jobasyna toqtaldy. Osy jobany júzege asyrýda Qazaqstannyń áleýeti joǵary.

«Germanııanyń kásiporyndary sýtegi, jel jáne kún energııasy jobalarynda aldyńǵy qatarda tur. Biz Astanada Sýtegi dıplomatııasy keńsesin ashýdy josparlap otyrmyz. Bul bıýro sarapshylar men mamandardy tartý turǵysynda mańyzdy bolmaq. Osy oraıda mańyzdy jobalardy naqty iske asyrýǵa jaǵdaı jasalady», - dedi Annalena Berbok.

Munymen qosa ol Qazaqstan qazirgi kezde mańyzdy reformalardy iske asyryp jatqanyn atap ótti.

«Biz saıası reforma, zań ústemdigi, adam quqyqtary jónindegi dıalogty keńeıtkimiz keledi. Ashyq, kúshti jáne ózine senimdi azamattyq qoǵam ınnovatsııalar men tabysty bolashaqqa jol bastaıtynyna senimdimin», - dedi Germanııa mınıstri.

Osyǵan deıin Qazaqstannyń Syrtqy ister mınıstri Muhter Tileýberdi elde nemis ınvestorlaryna barynsha qolaıly jaǵdaı jasalyp otyǵandyǵyn aıtqan edi.