Germanııa kásipkerleri Qaraǵandy oblysynda bolat óndirisine ınvestıtsııa salmaq

QARAǴANDY. QazAqparat – Qaraǵandy oblysynyń ákimi Jeńis Qasymbek Germanııa Federatıvtik Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Tılo Klınnerdi qabyldady.

Kezdesýde óńir men Germanııa arasyndaǵy yntymaqtastyqty damytý máseleleri talqylandy, dep habarlaıdy QazAqparat tilshisi.

«Qaraǵandy oblysynda Germanııalyq kompanııalarmen birlesken kásiporyndar sany jyl saıyn artyp keledi. Búginde olardyń sany 120-ǵa jetken. Kásiporyndar saýda, aýyl sharýashylyǵy, taý-ken jáne óńdeý ónerkásibi, kólik, bilim berý, kásibı jáne ǵylymı qyzmet sııaqty taǵy da basqa salalarda jumys isteıdi. Sońǵy ýaqytta oblysta Germanııa kapıtalynyń qatysýymen birqatar iri jobalar iske asyryla bastady. Olardyń qatarynda «Linde Gas Kazakhstan» JShS ónerkásiptik gaz óndirý zaýyty, Saran qalasy men Aǵadyr kentinde kún elektr stantsııalaryn salý sııaqty mańyzdy jobalar bar. Biz nemis kompanııalaryn tartýǵa múddelimiz. Germanııa biz úshin strategııalyq saýda-ekonomıkalyq jáne mádenı áriptes bolyp tabylady», – dedi Jeńis Qasymbek.

Óńir basshysy «Saryarqa» azat ekonomıkalyq aýmaǵynda 2014 jyldan bastap german kapıtalynyń qatysýymen eki zaýyt – «Bemer Armatýra» jáne «Izoplıýs Tsentralnaıa Azııa» jumys isteıtinin eske saldy. Aımaq basshysy nemis bıznesin Saran qalasynda qurylǵan jańa ındýstrııalyq aımaqta yntymaqtastyqqa shaqyrdy.

«Oblysta 32 myńnan astam etnıkalyq nemister turady», dep atap ótti Jeńis Qasymbek.

Ótken jyly óńirdiń Germanııamen syrtqy saýda aınalymy 71,3 mln AQSh dollaryn qurady. Kezdesýde málimdelgen kólemdi ulǵaıtý múmkindikteri bar.

«Men metallýrgııa salasyndaǵy yntymaqtastyqtyń jańa múmkindikterin talqylaý maqsatynda keldim. Qaraǵandy oblysynda iskerlik seriktestikti keńeıtýge múmkindik beretin kásiporyndar klasteri bar. Gaz óndirisin keńeıtý josparlary bar. Búgin men «ArselorMıttal Temirtaý» basshylyǵymen kezdesemin. Daıyndyq kezeńinde nemis bıznesi qatysýǵa daıyn joba bar. Bolashaqta «jasyl» bolat shyǵarýǵa aýysýǵa bolady. Bul ekologııany jaqsartýǵa kómektesedi», – dedi Tıno Klınner myrza.

Elshi osy jobany qaraý, máselelerdi pysyqtaý jáne sheshim qabyldaý úshin jumys tobyn qurýdy usyndy.

«Jalpy bul biz úshin ózekti. Biz yntymaqtasýǵa daıynbyz», – dep sendirdi Jeńis Qasymbek.

Ákimmen kezdesýden keıin Elshi Temirtaýǵa bet aldy. Ol «ArselorMıttal Temirtaý» jáne Temirtaý joǵary polıtehnıkalyq kolledjine barady. Oqý ornynda dýaldy oqytýdyń nemis modeli negizinde mamandar daıarlaý boıynsha joba iske asyrylady.