Germanııa kantsleri sırııalyq bosqyndarǵa qoldaý bildirdi

<p>ALMATY. KAZINFORM &ndash; Germanııada eńbek etip, qoǵamǵa sińgen sırııalyq azamattar ary qaraı da elde qala berýine bolady. Osy aptada kantsler Olaf Sholts halyqqa úndeýinde osylaı dep málimdedi. Bul týraly <a href="https://24.kz/kz/zha-aly-tar/lemde/item/685428-germaniya-kantsleri-siriyaly-bos-yndar-a-oldau-bildirdi" target="_blank" rel="noopener">24 kz</a> jazdy.</p>

Asad rejıminiń qulaýyna baılanysty Býndestagtaǵy depýtattar sırııalyq bosqyndardy eline qaıtarý máselesin kóterip, tipti deportatsııa jasaýdyń da múmkin ekenni tilge tıek etken edi. Osyǵan baılanysty Almanııada bas saýǵalap júrgen mıgranttar alańdaýshylyq tanyta bastaǵan. Biraq Sholtstiń úndeýinen keıin resmı Berlınniń pozıtsııasy aıqyndala túskendeı. Bul Asad rejımi qulady degendi estigen Berlındegi sırııalyqtar. Deni aldyńǵy kantsler Angela Merkel kezinde Almanııaǵa azamattyq soǵystan bas saýǵalap kelgen. Qazir olardyń sany mıllıonǵa jýyqtaǵan.

Túrkııa men Lıvannan keıingi eń kóp sırııalyq bosqyndar dál osy Germanııany panalap júr. Alaıda olardyń qýanyshy osy aptada deportatsııa qaýpimen aralasyp, úreıge ulasty. Aldaǵy saılaýda upaı jınaǵysy kelgen Býndestagtaǵy partııalar halyqty mezi etken mıgratsııa máselesin jeleý etip, sırııalyqtardy Otanyna kóshirýdi sóz ete bastady. Jańadan bosqyn statýsyn berýdi de ýaqytsha doǵardy. Aptaǵa sozylǵan talas tartystyń núktesin kantsler Olaf Sholts ózi qoımaq bolyp, áleýmettik jelide úndeý jarııalady.

— Biz sırııalyq bosqyndardyń nemis tilin úırenýine, mektepterimizde bilim alýyna, jumys istep, osy elde tamyryn tereń jaıýyna kómektestik. Bul biz úshin zor jetistik. Búgingi tańda Germanııanyń tek densaýlyq saqtaý salasynda bes myńnan asa sırııalyq dáriger qyzmet etip júr. Depýtattar arasyndaǵy keı málimdemeler dál osyndaı sırııalyq azamattardyń kóńiline kúdik uıalatqanynan habardarmyn. Biraq barshańyzǵa mynany aıtqym keledi. Germanııada eńbek etip, qoǵamǵa sińgen árbir sheteldik azamat ári qaraı da elimizde qalýyna tolyqtaı quqy bar, — deıdi Germanııa kantsleri Olaf Sholts.

Germanııa, Berlın

Kantslerdiń sózin nemis jýrnaly Der Spiegel de rastap otyr. Olardyń zertteýinshe qazir Germanııanyń medıtsına salasynda 5758 sırııalyq dáriger jumys isteıdi. Al olardyń Sırııaǵa kóshirilýi onsyz da maman tapshylyǵynan qınalyp otyrǵan nemistiń densaýlyq saqtaý salasyna zor salmaq salýy múmkin. 

— Sırııada Asad rejımi qulady degende qýanǵanymyz ras. Týǵan jerimizdi saǵyndyq. Oralǵymyz-aq keledi. Alaıda qazir kóship barýǵa jaǵdaı turaqsyz. Germanııadaǵy sırııalyq dárigerler tobyndaǵy saýalnamada Otanyna qaıtqysy kelgenimen, ondaǵy ahýaldyń jaqsaryp, turaqtalǵanyn kúteıik degenderdiń qarasy qalyń. Ázirge kesip jaýap aıtý qıyn bolyp tur, - sırııalyq dáriger Sandı Isa.

Al, sırııalyq dáriger Faızal Shehade balalary nemis mektepterinde oqıtynyn aıtady.

— Meniń otbasym, dostarym, kórshilerim bári Germanııada. Balalarym nemis mektepterine barady. Osy jaqqa úırenip qaldyq. Ári Sırııadaǵy jaǵdaı aldaǵy bir-eki jyldyń ishinde turaqtalsa, naqty sheshimdi sol kezde jasarmyz dep oılaımyn. Osyndaǵy sırııalyqtar «qaıta azat bolǵan Otanymyzǵa qalaı paıdam tıedi degendi qaperinde ustap júr, - deıdi sırııalyq dáriger Faızal Shehade.

Iordanııa, Aqaba

Ázirge Sırııadaǵy bıliktiń qandaı bolary belgisiz. Osy kúnderi Iordanııada Germanııamen qatar Túrkııa, AQSh, Arab jáne Eýroodaq elderiniń dıplomattary bas qosyp, Shamnyń bolashaǵyn talqylaýdy bastap ketti. Sondyqtan shekarasy ortaq Túrkııadaǵy sırııalyqtarǵa qaraǵanda Almanııadaǵy bosqyndar áliptiń artyn baǵýdy jón kórip otyr.