Germanııa ekonomıkasy Qytaıdaǵy konıýnktýranyń álsireýinen zardap shegip otyr
Qytaıdaǵy ekonomıkalyq jaǵdaıdyń álsireýi eki eldiń «bir-birimen tyǵyz ekonomıkalyq baılanysy» saldarynan ásirese Germanııaǵa keri áserin tıgizip jatyr. Osy jyldyń birinshi jartyjyldyǵynda Germanııadan Qytaıǵa eksport 8,5 paıyzǵa, al Qytaıdan ımport 16,6 paıyzǵa qysqarǵan. Bul týraly 30 tamyz, sársenbi kúni jarııalanǵan Funke toby basylymdaryna bergen suhbatynda Saýda-ónerkásip palatalary Federaldyq qaýymdastyǵynyń (DIHK) syrtqy ekonomıkalyq qyzmet bóliminiń basshysy Folker Traıer (Volker Treier) habarlady.
Onyń aıtýynsha, Germanııada bir mıllıon jumys orny Qytaı eksportyna táýeldi. Bul rette Traıer Qytaıǵa konıýktýranyń álsireýinen Germanııanyń avtomobıl, hımııa ónerkásibi jáne mashına jasaý sııaqty klassıkalyq eksporttyq salalary ǵana emes, sonymen birge energetıkalyq kóshý jáne ulttyq ekonomıkany tsıfrlandyrý sııaqty mańyzdy salalar da zardap shegip otyrǵanyn atap ótti.
DIHK basshylarynyń biri túsindirgendeı, bul salalarda Germanııa Qytaıdan keletin ımportqa qatty táýeldi. Jaqynda Qytaı ekonomısterdiń kóńilin qaldyrǵan birqatar ónerkásip, eksport jáne bólshek saýda derekterin jarııalady. Bul salalardaǵy quldyraý, eń aldymen Qytaı ekonomıkasyn qatty báseńdetken koronavırýs pandemııasynyń saldaryna baılanysty.
Jeltoqsan aıynda Qytaı koronavırýsqa qarsy shekteýlerdi alyp tastady, biraq ósýdiń tez qalpyna kelýine degen úmit aqtalmady. Buǵan ishki suranystyń álsizdigi men Qytaıdaǵy jyljymaıtyn múlik daǵdarysy áser etti.