Germanııa áýejaılarynda jumysshylar ereýilge shyqty

ASTANA. QazAqparat - Germanııada 17 aqpan kúni tańerteń áýejaılar ereýilge shyǵyp, bul jaǵdaı eldegi áýe qozǵalysynyń toqtap qalýyna ákeldi. Bul týraly QazAqparat DW agenttigine silteme jasap habarlaıdy.

Ereýil osy naýqanǵa qatysqan jeti áýejaıdyń ishinde túngi ýaqytta jumys isteýge ruqsat etilgen Gannover áýejaıynan bastaldy.

Ver.di kásipodaq uıymynyń málimetinshe, Gannover áýejaıy is júzinde jumysyn toqtatqan.

Ereýildi uıymdastyrýshylar Maındegi Frankfýrt, Mıýnhen, Shtýtgart, Bremen, Gambýrg jáne Dortmýnd áýejaılaryndaǵy barlyq reısterge múmkindiginshe kedergi jasamaq nıette.

ADV áýejaılar qaýymdastyǵynyń baǵalaýynsha, 2340 reıstiń toqtatylýynan 300 myńǵa jýyq jolaýshy josparlaǵan jerine usha almaı qalady.

Birlestik bolyp jatqan jaǵdaıdy eńbek janjalynyń buryn-sońdy bolmaǵan órshýi dep atady.

Bir ǵana Lufthansa áýe kompanııasy 1300-ge jýyq reısti toqtatýǵa májbúr boldy.

Ushýdan jappaı bas tartý áýejaılarda 15 aqpanda ǵana túzetilgen aýqymdy kompıýterlik aqaýdan keıin oryn aldy.

Qazirgi ýaqytta Germanııadaǵy memlekettik sektor qyzmetkerleri narazylyq sharalaryn tek áýejaılarda ǵana emes, basqa jerlerde de ótkizip jatyr.

Olardyń basty talaby - eńbek jaǵdaıyn jaqsartý. 17 aqpanda jumysshylardyń talaptaryn qoldaýǵa arnalǵan jappaı ereýilge shyǵý josparlanǵan.

Ver.di 2,5 mln qyzmetkeri úshin jalaqyny 10,5 paıyzǵa kóterýdi jáne 500 eýro kóleminde bir rettik tólem óteýdi talap etedi. Eńbek shartynyń merzimi 12 aı bolýy kerek.

Jumys berýshiler bul talaptardy qabyldamaı otyr. Kelissózdiń kelesi raýndy 22-23 aqpanda Potsdamda ótedi dep belgilendi.

Foto: dw.com