Germanııa áskerı tutqynda bolǵan 17 qazaqstandyqqa ótemaqy tóleıdi

ALMATY. QazAqparat - QR Prezıdentiniń Arhıvi Ekinshi dúnıejúzilik soǵys kezinde Germanııa tarapynda áskerı tutqynda bolǵandarǵa tólenetin ótemaqyny alý úshin qazaqstandyq 17 ardagerdiń qujatyn resimdedi. Qazirgi ýaqytta 11 ardager ótemaqylaryn alǵan bolsa, 6 adamnyń qujaty GFR-diń qaraýynda, dedi «QazAqparat» tilshisiniń saýalyna jaýap bergen QR Prezıdenti Arhıviniń dırektory, professor Borıs Japarov.  

Borıs Japarovtyń aıtýynsha, 2015 jyly mamyr aıynda Germanııa Federatıvtik Respýblıkasy burynǵy keńestik áskerı tutqyndarǵa 2500 eýro kóleminde ótemaqy tóleý týraly sheshimin qabyldaǵan. Qujattardy qabyldaý bıyl qyrkúıek aıynda aıaqtalady.

«Ótemaqy 1941 jyldyń 22 maýsymynan 1945 jyldyń 8 mamyryna deıin tutqynda bolǵan burynǵy keńestik áskerı qyzmetkerlerge beriledi. Bekitilgen saýalnama-ótinishti toltyryp, 2017 jyldyń 17 qyrkúıegine deıin jiberý qajet. Saýalnamadaǵy aqparatty Germanııanyń organdary teksergennen keıin jáne berilgen málimetter durys bolǵan jaǵdaıda, kózi tiri burynǵy áskerı tutqynǵa, ıaǵnı QR azamatyna 2500 evro kóleminde ótemaqy tólenedi. 2016 jyly QR Prezıdentiniń Arhıvi buryn áskerı tutqynda bolǵan 17 qazaqstandyqtyń ótemaqy alýyna qujattardy resimdeýge kómek kórsetti. Atalǵan jumys Batys Qazaqstan oblysy memlekettik, Shymkent óńirlik memlekettik arhıvterimen birlese otyryp júrgizildi. Qazirgi ýaqytta 2016-2017 jj. 11 ardager (Astana qalasynyń, Batys Qazaqstan jáne Ońtústik Qazaqstan oblystarynyń turǵyndary) ótemaqy aldy», - dedi B.Japarov.

QR Prezıdenti Arhıvi qyzmetkerleriniń aıtýynsha, qujattardy jınap, Germanııaǵa joldaý ózge oblystardyń quzyrly mekemeleri arqyly da jasalǵan. Al Prezıdent Arhıvi arqyly ótkizilgen qujattardyń barlyq sany - 17. 

Aıta keteıik, Qazaqstan Respýblıkasy Prezıdentiniń Arhıvi 2015 jyly «Ekinshi dúnıejúzilik soǵysyndaǵy qazaqstandyq áskerı tutqyndar: ádebıetter, derekter, málimetter bazasy» ǵylymı-zertteý jobasyn iske qosqan bolatyn. Osy jobanyń aıasynda www.tutkyn.kz veb-saıty iske qosyldy, onda qazaqstandyq áskerı tutqyndardyń tizimi bar onlaın respýblıkalyq aqparattyq bazasy ornalastyryldy.

Jobany júzege asyrý barysynda tarıhshy ǵalymdarmen kezdesýler ótkizilip, taqyryp boıynsha arhıvti qujattar, maqalalar men estelikter jınaqtalyp jatyr. Eki jyl ishinde 35 509 myń qazaqstandyq áskerı tutqynnyń esimi aqparattyq bazaǵa engizildi.

«Almaty qalasy Іshki ister departamenti Aqparattyq-analıtıkalyq ortalyǵynyń arnaıy memlekettik arhıviniń № 10 «Burynǵy áskerı tutqyndarǵa súzgilik jáne trofeılik materıaldar» qorynan 5274 famılııa alyndy. Bul joba qoǵamda úlken qyzyǵýshylyq týdyrdy, iz-túzsiz joǵalǵan jaýyngerlerdiń týysqandary olardy áli de izdeýde. Joba jumysy týraly BAQ keńinen jarııa etildi, respýblıkalyq telearnalar bul taqyrypqa oraı telebaǵdarmalar men suhbattar, jańalyqtar kórsetti. Sonyń negizinde joba týraly bilip, halyq Arhıvke tutqynda bolǵan nemese habarsyz ketken týysqandary týraly suraý salýlaryn jibere bastady. 2015-2017 jyldar aralyǵynda 91 ótinim tústi», - dedi QR Prezıdenti Arhıviniń dırektory Borıs Japarov.