Germanııa arhıvinen Baıqońyr ǵarysh aılaǵyna qatysty qupııa qujattar tabyldy

ASTANA. QazAqparat – Mádenıet jáne sport mınıstrliginiń keńeıtilgen alqa otyrysynda baıandama jasaǵan QR Ulttyq arhıviniń dırektory Saǵıla Nurlanova byltyr shet elderdiń muraǵatynan elge ákelingen qundy qujattar týraly aıtty, dep habarlaıdy QazAqparat tilshisi.

«Ótken jyly Arhıv isteri jáne qujattamany basqarý komıtetiniń uıymdastyrýymen respýblıkalyq arhıv qyzmetkerleri 14 memleketke shyqty. Ol jaqtardan asa qundy, mańyzdy 7 myńǵa jýyq qujat ákelindi. Máselen, Germanııanyń arhıvterinen Qazaqstanda bolǵan Avstrııa-Vengrııa ımperııasy zertteýshileriniń etnografııalyq esepteri, HІH ǵasyrdaǵy Qazaqstanǵa, Ortalyq Azııaǵa jasalǵan nemis zertteý saparlarynyń nátıjeleri, Shtazı arhıvinde buryn qupııa bolǵan Baıqońyr ǵarysh aılaǵyna qatysty qujattar tabyldy. Sankt-Peterbýrgtegi Reseı memlekettik tarıhı arhıvinde XVIII-HІH ǵasyrdyń basyndaǵy qazaq sultandarynyń ımperatorlyq ákimshilik ókilderimen jazysqan hattary tabyldy. Kóptegen jyldar boıy qazaq dalasynda ómir súrgen qazaq tarıhynyń bilgiri Vasılıı Grıgorevtiń uly dalada zańdyq kúshi bar ádet-ǵuryptardy - kisi óltirý, urlyq qunyn tóleý týraly qazaq zańdarynyń úzindilerin jınap, basyp shyǵarý qajettiligi aıtylǵan qujattary tabyldy. ıAǵnı, budan qazaq dalasynda quqyqtyq normalar men qylmystyq kodekstiń jumys istegenin kórýge bolady. Bul qazaq qoǵamy artta qaldy degen jansaq pikirlerdi joqqa shyǵarady», - dep málimdedi Saǵıla Nurlanova.

Onyń aıtýynsha, Túrkııanyń Ystanbul qalasyndaǵy Osman arhıvinen HІH-HH ǵasyrlardaǵy qazaq jerine qatysty málimetter toptastyrylǵan kitaptar ákelingen. Sonymen qatar, Tatarstannyń muraǵatynan da tarıhı tyń derekter anyqtalǵan. Atap aıtqanda, ol eldiń arhıvinen musylman sezderiniń qararlary men hattamalary tabylǵan. Saǵıla Nurlanovanyń sózinshe, atalǵan sezderge Álıhan Bókeıhan, Baqytjan Qarataev jáne basqa da qazaq zııalylaryi qatysqan.