Geosaıası turaqsyzdyq syrtqy saıası strategııanyń jan-jaqtylyǵyn talap etedi – Murat Nurtileý

ASTANA. QazAqparat – Búgin Astanaǵa Italııa Respýblıkasynyń Mınıstrler keńesi tórǵasynyń orynbasary – Syrtqy ister jáne halyqaralyq yntymaqtastyq mınıstri Antonıo Taıanı resmı saparmen keldi. Qurmetti meımandy QR Premer-Mınıstriniń orynbasary – Syrtqy ister mınıstri Murat Nurtileý qarsy aldy, dep habarlaıdy QazAqparat tilshisi.

«Elordaǵa alǵash ret resmı saparmen kelgen Italııa Respýblıkasy Premer-Mınıstriniń orynbasary – Syrtqy ister jáne halyqaralyq yntymaqtastyq mınıstri Antonıo Taıanı myrzamen mazmundy ári nátıjeli kelissózder júrgizdik. Búgingi tańdaǵy geosaıası jáne geoekonomıkalyq turaqsyzdyq elimizdiń syrtqy saıası strategııasynan jan-jaqtylyqty talap etedi. Sondyqtan, yntymaqtastyǵymyz bekigen jaqyn kórshilerimiz, strategııalyq áritpesterimiz – Reseı jáne Qytaımen qosa Qazaqstan álemniń ózge de yqpaldy ári bedeldi oıynshylarymen baılanystaryn nyǵaıtýda», - dedi QR Premer-Mınıstriniń orynbasary – Syrtqy ister mınıstri Murat Nurtileý mınıstrlikte ótken baspasóz máslıhatynda.

Mınıstrdiń málimdeýinshe, Italııa halyqaralyq arenadaǵy jáne Eýroodaqtaǵy bizdiń asa mańyzdy strategııalyq áriptesimiz retinde, Qazaqstannyń kópvektorly saıasatynda erekshe oryn alady.

«Qazaqstan men Italııa arasyndaǵy bıik jáne joǵary deńgeıde syndarly saıası dıalog pen strategııalyq áriptestik ornatylǵanyn erekshe qanaǵatpen atap ótemin. Sonyń ishinde úkimet jáne parlamentaralyq yntymaqstastyq ta qarqyndy damyp keledi. Ekijaqty sharttyq-quqyqtyq bazamyz aıtarlyqtaı aýqymdy», - deıdi M. Nurtileý.