Geologııalyq zertteýlerge basymdyq beretin «Eýrazııa» jobasy aıasynda konsortsıým qurý kózdeledi
Brıfıng Elbasy aıqyndaǵan «100 qadam» Ult jospary aıasynda jer qoınaýyn paıdalaný salasyndaǵy ilgeri reformalar taqyrybynda ótken bolatyn.
«Qazaqstannyń memlekettik organdary geologııalyq zertteýlerge, izdeý-barlaý jumystaryna ınvestıtsııa aǵymyn yntalandyrý maqsatynda «Eýrazııa» halyqaralyq jobasyna salyq júktemesin tómendetý, ımporttyq, qosymsha qun salyǵyn tómendetý, ákimshilik kedergilerdi tómendetý, protsedýralardy jeńildetý máselelerin qarastyrýda. Budan bólek, ken oryndaryn zertteýdiń kúrdeliligine baılanysty jeńildikter men preferentsııalar usyný arqyly salyq salýlarǵa saralanǵan qadamdar josparlanady. Osy arqyly ınvestorlar jumys nátıjeleriniń qorytyndysy boıynsha ashylýy yqtımal ken orynyna rentabeldiliktiń yńǵaıly normalaryn ıelene alady», - deıdi U. Qarabalın.
Onyń aıtýynsha, «Eýrazııa» sekildi aýqymdy halyqaralyq joba aıasynda qoıylǵan mindetterdi júzege asyrý maqsatynda 2016-2021 jyldar boıynsha atqarylatyn baǵdarlamalyq jumystarǵa memlekettik-jeke menshik áriptestik shartymen konsortsıým qurý qarastyrylady. Budan bólek, 2015-2016 jyldarǵa Jer qoınaýyn paıdalaný kodeksine, al aǵymdaǵy jyly geologııalyq zertteýler jumystary barysynda salyqtyq júktemelerdi tómendetýge arnalǵan ózgerister Salyq kodeksine engizý kózdeledi.