Geologııa salasyn damytýdyń 2026 jylǵa deıingi tujyrymdamasy ázirlendi

NUR-SULTAN. QazAqparat – Qazaqstanda geologııa salasyn ilgeriletýdiń basty tetikteri ataldy, dep habarlaıdy QazAqparat tilshisi.

«Qazir memlekettik geologııalyq zertteýdi jandandyrý qajettigi týyndap otyr. Bul rette 2020-2022 jyldary geologııalyq zertteýler júrgizýge memleketten 25,8 mlrd teńge qarjy bólindi. Álemdik tájirıbege súıensek, ınvestor óz qarajatyn boljamdy resýrsy bar, perspektıvaly bazasy qalyptasqan jáne memleket esebinen júrgiziletin ken oryndaryna quıýǵa daıyn. Osyǵan baılanysty Memleket basshysynyń tapsyrmasyn oryndaý barysynda geologııa salasynyń aldynda birneshe mindet tur», - dedi Serikqalı Brekeshev QR Parlamenti Májilisinde ótken geologııa salasyn damytý taqyrybyna arnalǵan dóńgelek ústel barysynda.

Mınıstrdiń málimdeýinshe, aldymen geologııalyq zertteý kólemin arttyryp, bolashaǵy bar ýchaskelerdi anyqtaý qajet.

«Ekinshiden, geologııany ǵylym retinde damytyp, sala ınfraqurylymyna mán berý kerek. Bul baǵyttaǵy jumys «Qazaqstandyqtardyń ál-aýqatyn arttyrýǵa baǵyttalǵan ornyqty ekonomıkalyq ósý» atty ulttyq jobanyń «Geologııa salasyn damytý» boıynsha is-sharalardy iske asyrý sheńberinde júrip jatyr. Úshinshiden, geologııa salasyndaǵy óndiristik-tehnologııalyq protsesterdi tsıfrlandyrý, avtomattandyrý júıesine kóshirý qajet. Tórtinshiden, atalǵan salaǵa quıylatyn ınvestıtsııa tartymdylyǵyn arttyryp, mıneraldyq-shıkizat bazasyn molaıtý úshin zańnamany jetildirýimiz tıis», - deıdi ol.

Odan bólek, vedomstvo basshysy Qazaqstanda geologııa salasyn damytýdyń 2026 jylǵa deıingi tujyrymdama jobasy ázirlengenin aıtty.

Buǵan deıin S. Brekeshev monoqalalarda ken qoryn ýaqtyly tolyqtyrý qajettigi máselesin kótergen edi.