Gennadıı Golovkınniń jekpe-jegi «Qazaqstan» telearnasynyń tikeleı efırinde kórsetiledi

ASTANA. QazAqparat - Gennadıı Golovkınniń amerıkandyq kishi Vıllı Monromen mamyr aıynyń ortasynda ótetin jekpe-jegin «Qazaqstan» telearnasy tikeleı efırden kórsetedi. Bul týraly «Qazaqstan» RTRK baspasóz qyzmetinen habarlady.

17 mamyr kúni tańerteń «Qazaqstan» telearnasy 2015 jylǵy basty kúresterdiń biri - orta salmaqtaǵy WBA jáne IBO nusqalary boıynsha álem chempıony qazaqstandyq G.Golovkın men orta salmaqta «Boxcino-2014» týrnıriniń jeńimpazy 28 jasar kishi V.Monromen kúresin Los-Andjeles qalasynan tikeleı efırde kórsetedi.

«17 myń adam sııatyn Los-Andjelestiń (AQSh) jańartylǵan «The Forum» arenasynan úlken boks keshi 17 mamyr kúni saǵat 7.00-de «Qazaqstan» telearnasynan kórsetiledi. Golovkın men kishi Monronyń kúresi shamamen tańǵy 9.00-de kórsetiledi. Translıatsııalar 17 mamyr kúni kúndizgi ýaqytta jáne 18 mamyr kúni keshki ýaqytta «Kazsport» telearnasynan qaıtalanady», delingen habarlamada.

G.Golovkın Qaraǵandy qalasynyń týmasy, qazaqstandyq boksshy, 2003 jyly áýesqoı boksshylar arasynda álem chempıony jáne 2004 jyly Olımpıada oıyndarynyń vıtse-chempıony. Qazaqstan Respýblıkasynyń eńbek sińirgen sport sheberi, Qazaqstannyń 7 dúrkin chempıony, halyqaralyq týrnırlerdiń jeńimpazy.

2013 jyly 24 sáýirde Qazaqstanda halqy Assambleıasynyń HH sessııasynda G.Golovkın óziniń shyǵý tegi týraly bylaı degen bolatyn: «Ultym týraly suraǵan kezde, men bylaı dep jaýap beremin: Ákem - orys, sheshem - káris, al men - qazaqpyn! Meniń barlyq jeńisim elime arnalady, meniń halqyma, Prezıdentime arnalady!».