Gennadıı Golovkınniń kelesi qarsylasy qandaı jetistikterge jetken

NUR-SULTAN. QazAqparat - Búgin orta salmaqtaǵy burynǵy álem chempıony Gennadıı Golovkın (38-1-1, 34 KO) rıngke qaıta oralatynyn málimdedi. Onyń kelesi qarsylasy - kanadalyq Stıv Rolls (19-0, 10 KO), dep habarlaıdy QazAqparat tilshisi.

Stıv Rolls Kanadanyń Ontarıo provıntsııasynda dúnıege kelgen. GGG-den eki jas kishi. Osy aptanyń basynda 35-ke keldi. S.Rolls bokstan ulttyq quramanyń sapynda da boldy. Áýesqoı boksta 83 ret jeńiske jetip, 14 ret utylǵan. 2009 jyly Italııanyń Mılan qalasynda ótken Halyqaralyq boks qaýymdastyǵynyń (AIBA) erler arasyndaǵy chempıonatyna da qatysty. Alǵashqy eki jekpe-jekte jeńiske jetti. Alaıda 2008 jylǵy Olımpıadanyń qola júldegeri Vıdjender Sınghtan utylyp qaldy. Degenmen, osy jarystan keıin Rolls álem boıynsha 12 orynǵa kóterildi.

2011 jyly Stıv Rolls kásibı boksqa aýysyp, ekinshi orta salmaqta (76,2 keli) óner kórsete bastady. Jekpe-jekterdiń basym bóligin óz elinde ótkizdi. Alty ret AQSh-ta judyryqtasty. S.Rolls osy ýaqytqa deıin birde-bir ret jeńilmegen. 19 jekpe-jekti 10 ret nokaýtpen aıaqtady. Oǵan qarsy shyqqan boksshylardyń ishinde Keandre Lezervýd (21-6-1, 13 KO), Damıan Bonellı (23-6, 20 KO), Andrık Saralegı (8-5, 6 KO), Demond Nıkolson (21-3-1, 20 KO), Attıla Korosh (15-18-1, 11 KO), Emmanýel Sanches (7-12-1, 1 KO), Stıd Výdell (15-1-1, 10 KO), Taı Edmonds (11-3, 8 KO), Iozef Kormanı (19-42-1, 6 KO), Norbert Shekeresh (18-73-4, 9 KO) syndy boksshylar bar. S.Rolls 12 raýndyq jekpe-jekti áli ótkizgen emes. Degenmen, AQSh boıynsha USBA tıtýlynyń ıegeri bolyp sanalady. Buǵan deıin ıýnıorlar arasynda NABF belbeýin de utqan bolatyn.

Aıta keteıik, Gennadıı Golovkın men Stıv Rolls arasyndaǵy jekpe-jek 8 maýsymda Nıý-Iorktiń (AQSh) Madison Square Garden arenasynda ótedi. Ýaqyt aıyrmashylyǵyna baılanysty Qazaqstandaǵy translıatsııa 9 maýsymda bolady. Olardyń jekpe-jegi aralyq salmaq - 73,8 kelide uıymdastyrylady. GGG-diń ózi orta salmaqta - 72,5 kelide óner kórsetedi.

«Men ózim MSG-degi kezekti Big Drama Show-dyń alynda qatty qobaljyp turmyn. MSG fanattary fantastıka ǵoı. Men boksty jaqsy kóremin. Sondyqtan Stıv Rollsqa qarsy jekpe-jegimdi kóretinderge eń úzdik ónerimdi kórsetýge ýáde etemin», - deıdi G.Golovkın.