Gennadıı Golovkın Ulttyq olımpıada komıtetiniń prezıdenti bolyp saılandy
QR UOK Bas assambleıasynyń otyrysyna olımpıadalyq sport túrleri boıynsha 35 ulttyq sport federatsııasynyń ókilderi men uıymnyń sportshylar komıssııasynan 2 ókil qatysty.
34 qatysýshy Gennadıı Golovkınniń kandıdatýrasyn qoldady, ekeýi qalys qaldy.
Sport áleminde GGG laqap atymen tanymal bolǵan Gennadıı Golovkın sharshy alańda shashasyna shań juqtyrmaı, áýesqoı da, kásipqoı da boksta óziniń urys mánerimen, erekshe stılimen mıllıondaǵan jankúıerdiń súıikti sportshysyna aınalǵan.
«Ákem – orys, sheshem – káris, al ózim - qazaqpyn» deıtin Gennadıı Golovkın 1982 jyldyń 28 aqpanynda Qaraǵandy qalasynda dúnıege kelgen. Ol turǵan Maıqudyq aýdany sol ýaqyttarda qylmys órship turǵan qaýipti aımaq sanalatyn. Dál osy jaıt bala Genanyń sportpen aınalysýyna da sebep bolǵandaı.
Ol áýesqoı boksta 350 jekpe-jek ótkizip, onyń 345-inde jeńiske jetti. Esh ýaqytta nokaýt turmaq nokdaýnǵa da túsip kórgen joq. Gennadıı áýesqoı boksta Azııa, Álem chempıonattarynda top jardy. Alaıda, Olımpıada chempıony bola almady, kúmis medaldi qanaǵat tutty. Ol 2004 jyly Afınada ótken Olımpıada oıyndary bolatyn. Dál osy jazǵy oıyndarǵa Golovkın qazaqqa únemi altyn medal syılap kelgen 69 keli salmaq sanatynda barýy tıis edi. Degenmen, ol 75 kelige aýysyp, al 69 keli salmaqta el úmiti Baqtııar Artaevqa artylǵan bolatyn. Osy olımpıadada Baqtııar Artaev chempıon atansa, Gennadıı Golovkın kúmis júldeger atandy. Degenmen, áli kúnge deıin dál osy jekpe-jekke qatysty daý kóp. Kópshilik Gennadııdiń sol ýaqytta reseılik Gaıdarbek Gaıdarbekovten jeńilmegenin aıtady. Genanyń ózi de sol jekpe-jekte jeńilmegendigine senimdi.
«Men Azııa, Álem oıyndarynyń chempıony boldym. 2004 jyly Afınada ótken Olımpıada oıyndarynyń altyn medaline laıyqty boldym dep sanaımyn. Dál sol ýaqyttaǵy jaıt áýesqoı bostan túńiliýime sebep boldy», - degen edi sol jekpe-jekke qatysty sportshy L'Equipe basylymyna bergen suhbatynda.
Bir jyldan keıin Gennadıı Golovkın áýesqoı sportpen qosh aıtysyp, kásipqoı boksqa bet burdy.
Gennadıı Golovkınniń áýesqoı bokstaǵy jetistikteri:
2000 jyl – jasóspirim arasyndaǵy álem chempıonatynda jartylaı salmaqta chempıon;
2001 jyly – Shyǵys Azııa oıyndarynda jartylaı salmaqta chempıon;
2002 jyly – Astanada ótken bokstan álem chempıonatynda chempıon;
2002 jyly – Azııa oıyndarynyń chempıony;
2003 jyly – Bangkogte ótken álem chempıonatynyń chempıony;
2004 jyly – Azııa chempıonatynyń chempıony;
2004 jyly – Afınada ótken Olımpıada oıyndarynyń kúmis júldegeri.
Gennadıı Golovkın 2005 jyldan beri osy ýaqytqa deıin kásipqoı boksta 45 jekpe-jek ótkizdi.
Onyń 37-sin nokaýtpen aıaqtasa, bir jekpe-jeginde teń túsip, eki jekpe-jeginde upaı sanymen jeńilip qaldy.
Ol kásipqoı bokstaǵy alǵashqy jekpe-jegin 2006 jyldyń mamyrynda Gabor Balogqa qarsy ótkizip, ony birinshi raýndta-aq nokaýtqa jiberdi. Osydan keıin Genanyń juldyzdy sáti týdy.
WBA nusqasy boıynsha ortasha salmaqta álem chempıony ataǵyn 8 márte, IBO nusqasy boıynsha ortasha salmaqta álem chempıony ataǵyn 5 ret qorǵady. Kásipqoı boks tarıhynda ortasha salmaq boıynsha nokaýt boıynsha 89 paıyzdyq úlespen birinshi orynǵa da shyqty.
Gennadıı Golovkın sporttyq mansap jolynda ekinshi orta salmaqtaǵy álemniń absolıýttik chempıony Saýl Alvarespen úsh márte kezdesti.
Este bolsa, 2017 jyldyń qyrkúıeginde Golovkın men «Kanelo» kezdesýi teń aıaqtaldy. Al bir jyldan keıin, ıaǵnı 2018 jyldyń qyrkúıeginde Saýl Alvares tóreshiler sheshimimen Genadan basym túsken bolatyn. Eki sport juldyzynyń arasyndaǵy úshinshi kezdesý de otandasymyzdyń paıdasyna sheshilgen joq.