Gennadıı Golovkın: Úlken shoý kórgilerińiz kelse, «Kanelony» shaqyryńyzdar

NUR-SULTAN. QazAqparat - Nıý-Iorktegi «Medıson Skver Garden» arenasynda kanadalyq Stıv Rollsty jeńgen Gennadıı Golovkın qyrkúıekte rıngke shyǵatynyn málimdedi, dep habarlaıdy QazAqparat.

Kásibı bokstaǵy 39-shy kezdesýin jeńispen aıaqtaǵan Golovkın boks keshin qorytyndylap, suhbat berdi. Ol qyrkúıek aıynda «Kanelomen» kezdesýge daıyn ekenin jetkizdi.

«Men ózimdi jaqsy sezinip turmyn. Aldymen, meni qoldaýǵa kelgen jankúıerlerime alǵys aıtqym keledi. Men bastapqyda Stıv Rollsty baqylaýǵa aldym, qashyqtyqty saqtap bir-eki raýnda aıqasýǵa múmkindik berdim. Ol nashar kóringen joq. Biraq, onyń soqqylaryn sezbedim. Men rıngke qaıta oraldym. Ózimdi tıneıdjer retinde sezinemin. Endi kimmen rıngke shyqqym keletinin jaqsy bilesizder. Qyrkúıekte Saýl Alvaresti kezdesýge shaqyramyn. Úlken shoý kórgilerińiz kelse, «Kaneloǵa» osyny jetkizińizder. Men ótken eki bokstan soń úlken qorytyndy jasadym. Qoldaýlaryńyzǵa rahmet», - dedi Golovkın.

Eske salsaq, orta salmaqtaǵy WBA Super, WBC, IBF jáne IBO chempıony Gennadıı Golovkın kásibı bokstaǵy kezekti jeńisine qol jetkizdi.

Sonymen qatar, buǵan deıin jeńilip kórmegen jerlesimiz Álı Ahmedov tájirıbeli amerıkalyq Markýs MakDenıelden basym túsken bolatyn.