Gennadıı Golovkın týyp-ósken aýlasyna oıyn keshenin salyp berdi

ASTANA. QazAqparat - Búgin Maıqudyq shaǵyn aýdanynda saltanatty túrde jańa balalar oıyn alańy ashyldy. Ol tanymal boksshy Gennadıı Golovkınniń qarajatyna «Týǵan jer» baǵdarlamasynyń sheńberinde salyndy, dep habarlaıdy Qaraǵandy oblysy ákimdiginiń saıty.

Alańqaı boksshynyń týyp-ósken aýlasynda, 14-shy yqsham aýdannyń 11-shi úıi mańynda ornatyldy. Oıyn kesheni túrli pishindi bes syrǵanaqtan, úıshikten jáne kishigirim kópirden quralǵan. Munyń barlyǵy «KazPlast» qazaqstandyq kompanııasymen jasalǵan ónim. 

«Bul alańqaıdyń ashylýy - prezıdenttiń «Týǵan jer» baǵdaralamasynyń júzege asyp jatqandyǵynyń beligisi, - dep atap aıtty Oktıabr aýdanynyń ákimi Álimjan Qanaev. - Elbasy barlyq tabysty azamattardy óziniń týyp-ósken jerin umytpaýǵa shaqyrdy. Bizdiń boksshymyz Gennadıı Golovkın de bul bastamany qoldady. 

Gennadııdiń týyp, ósken aýlasynyń turǵyndary bul ıdeıany qýana qarsy aldy. Alańqaıdy ornatpas buryn jergilikti turǵyndar aýlada senbilik ótkizgen, aǵashtardyń túpterin áktep, tipti burynnan beri isten shyqqan eski temir átkenshekterdi de jóndep qoıǵan». 

«Bul jerde osyǵan deıin eski temir-tersekter ǵana bolǵan, barlyǵy usqynsyz bolatyn», - deıdi Nına Lepeha, 14-shi yqsham aýdandaǵy №11-shi úıdiń turǵyny. 

Turǵyndardyń aıtýynsha, alańqaıdy úsh kúnniń ishinde ornatqan eken. Jumyskerler tańǵy jetiden keshki jetige deıin ter tógip, eńbek etken. 
Keshenniń ashylý saltanatyna balalarǵa qyzyqty baǵdarlama uıymdastyrǵan anımatorlar shaqyrylǵan. 

Esterińizge sala keteıik, ótken aptada Gennadıı Golovkın Qaraǵandy oblysy ákimi Erlan Qoshanovpen jeke kezdesý barysynda óz qarajaty esebinen óziniń týyp-ósken aýlasynda balalar alańqaıyn ornatýdy uıǵarǵanyn jetkizgen bolatyn. 

Gennadıı Golovkın - ortasha salmaq dárejesinde judyryqtasatyn jeńilip kórmegen qazaqstandyq kásibı boksshy. Áýesqoılar arasyndaǵy álem chempıony, Olımpıada oıyndarynyń vıtse-chempıony. WBA, IBF, WBC, IBO nusqalary boıynsha álem chempıony. Ol «The Ring» jýrnalynyń nusqasy boıynsha salmaq mólsherine táýeldi emes eń úzdik boksshylardyń úshtigine engen.