Gennadıı Golovkın men Sergeı Derevıanchenko kelisimge keldi
Sońǵy suxbatynda «DiBella Entertainment» promoýterlik kompanııasynyń basshysy Lý DıBella qazaqstandyq boksshyǵa qarsy jekpe-jekti shegere turýǵa daıyn ekenin jetkizdi. Onyń aıtýynsha, 18 sáýirde ótetin tyńdaý barysynda Saýl Alvaresti alty aıdan artyq ýaqytqa shettetetin bolsa, Sergeı Derevıanchenkonyń komandasy Golovkınnen IBF mindettemelerin talap etýdi jalǵastyratyn bolady. GGG atalǵan uıymnyń belbeýin qorǵaýy tıis. Áıtpese, bir tıtýldan aıyrylady.
«Endi, 5 mamyrǵa deıin eki-aq apta qaldy. Sondyqtan Golovkın Derevıanchenkomen kezdespeıtin shyǵar. 18 sáýirde Nevadanyń atletıkalyq komıssııasy «Kaneloǵa» qatysty tyńdaýlardy ótkizedi. Sol kezde meksıkalyq boksshyny aqtap, ekeýiniń rematchyn qyrkúıekke aýystyratyn bolsa, biz kúte turamyz. Derevıanchenko basqa bireýmen jekpe-jek ótkize salady. Biz áý basta olardyń revanshyna qarsy bolǵan joqpyz. Al revanshty odan keıingi ýaqytqa aýystyratyn bolsa, biz jaı otyra almaımyz. Biz GGG men Sergeı arasyndaǵy jekpe-jektiń promoýterlik saýdasyn jáne kelissózderdi bastaýdy talap etetin bolamyz», - dedi Lý DıBella Dontae's Boxing Nation-ge bergen suxbatynda.
Aıta keteıik, buǵan deıin Nevada shtatynyń atletıkalyq komıssııasy Golovkınge 5 mamyrda amerıkalyq boksshy Vanes Martırosıanmen kezdesýge ruqsat bergen bolatyn. Oǵan WBC men WBA da kelisti. Alaıda IBF qarsylyq bildirip, ýkraınalyq boksshy Sergeı Derevıanchenkoǵa qarsy shyǵýdy talap etken bolatyn. Endi, Golovkın men Derevıanchenkonyń komandalary bir kelisimge kelse, 5 mamyrda GGG Vanes Martırosıanmen (36-3-1, 21 KO) judyryqtasýy ábden múmkin.