Gennadıı Golovkın mansabyn qashan aıaqtaıtynyn jáne Kanelomen úshinshi aıqasy týraly aıtty

ALMATY. QazAqparat - Tanymal qazaqstandyq kásipqoı boksshy, burynǵy álem chempıony Gennadıı Golovkın DAZN USA-ge bergen suhbatynda mansabyn neshe jasynda aıaqtaýdy josparlap otyrǵanyn aıtty, dep habarlaıdy QazAqparat tilshisi.

Taıaýda Golovkın DAZN-men alty aıqasqa josparlanǵan úsh jyldyq kelisim jasady. Ol 2021 jylǵa deıin jalǵasady.

«Men 40 jasymda toqtaıtyn shyǵarmyz. Degenmen, bolashaqty bilý múmkin emes... Maǵan qazir ol týraly aıtý qıyn, biraq 40 jasymda promoýshenimmen maqsatty túrde aınalysqym keledi», - dedi Golovkın suhbatynda.

Jýrnalıst «Jubaıyńyz 40 jasta judyryqtasýǵa ruqsat beredi me?» dep surady.

«Onyń ornyna jaýap berý qıyn, sebebi biz onymen muny durystap talqylaǵan joqpyz. Biraq, 40 jasta ózińniń aldyńdaǵy emes, otbasyńnyń aldyndaǵy jaýapkershilikti sezinýiń kereksiń ǵoı», - dedi qazaqstandyq boksshy.

Golovkın áńgimelesý barysynda DAZN-men seriktestik týraly aıtty.

«Bizdiń damyǵymyz keletin baǵytymyz bir. Qazirgi ýaqytta seriktespiz, meniń bolashaǵym jáne meniń promoýshenymnyń bolashaǵy úshin DAZN-men jumys istegenim jaqsy bolady», - dedi Gennadıı Golovkın.

Qazaqstandyq boksshy Kanelomen úshinshi aıqastyń múmkindigine qatysty pikir bildirdi.

«Ekeýmiz úshin de, jankúıerler úshin de bul óte mańyzdy. Eger olar osy jekpe-jekti kórgileri kelse, eger shynymen qyzyǵýshylyq týsa, bul aıqas bolady», - dedi G. Golovkın.