Gennadıı Golovkın Qaraǵandyda úlken sport keshenin salyp jatyr

ASTANA. QazAqparat - Qaraǵandy qalasyn mıllıondar qalasyna aınaldyrý jumysy qalaı iske asýda? Aýqymdy jospar týraly OKQ-da ótken baspasóz máslıhatynda Qaraǵandy oblysynyń ákimi Erlan Qoshanov baıandap berdi, dep habarlaıdy QazAqparat tilshisi.

«Prezıdent Qaraǵandyda bolǵanynda qalamyzdy mıllıon turǵyny bar shaharǵa aınaldyrý týraly aıtqan edi. Qazirgi tańda osy tapsyrma boıynsha Qaraǵandy qalasyn damytý strategııasyn jasap jatyrmyz. Osy strategııada Qaraǵandyny mıllıondar qalasyna aınaldyrý baǵytyndaǵy barlyq sharalar qarastyrylady. Naqty aıtsaq, bul rette álbette eń birinshiden turǵyn úı jáne áleýmettik nysandar qurylysy júrgiziledi. Qala Maıqudyq baǵytynda keńeıetin bolady», - deıdi Erlan Qoshanov.

Onyń aıtýynsha, Qaraǵandyda qysta zamanǵa saı balalar men jasóspirimder saraıynyń qurylysy bastalady. Ol jerde dástúrli úıirmelerden bólek, robototehnıka, modeldeý boıynsha sektsııalar  jumys istemek. Sonymen birge, oblys ákiminiń sózine sensek, sonymen birge kóktemde shaharda Olımpıadalyq talaptarǵa saı 50 metrlik júzý basseıni salynady.

«Qaraǵandyda óte kóp mádenı sharalar ótkiziledi. Mine, sondyqtan, biz kásibı 1500 oryndyq kontsert zalyn turǵyzamyz. Bizdiń atletter úshin arnaıy kúres ortalyǵy ashylady. Qaraǵandynyń temir jol vokzaly tolyǵymen rekonstrýktsııalanyp, jolaýshylar tasymaly eki jarym esege artatyn bolady. Eń bastysy, biz biregeı tarıhı fasadty saqtap qalǵaly otyrmyz», - deıdi ol.

Erlan Qoshanov sonymen birge óz sózinde boksshy Gennadıı Golovkın Qaraǵandyda jalpy aýmaǵy 5,5 myń sharshy metrlik kópfýnktsııaly sport keshenin salǵyzyp jatqanyn tilge tıek etti.