Gennadıı Golovkın «Kanelony» jelaıaq Ýseın Boltqa teńedi

ASTANA. QazAqparat - Qazaqstandyq boksshy Gennadıı Golovkın (37-0-1, 33 KO) ESPN Deportes tilshisi Bernardo Osýnaǵa suhbat berdi, dep habarlaıdy QazAqparat Sports.kz saıtyna silteme jasap.

Golovkın alda josparlanǵan meksıkalyq Saýl Alvarespen (49-1-2, 34 KO) qarymta jekpe-jegine daıyndyq týraly aıtyp, oǵan túzetýler engizýge qatysty pikirimen bólisti.

-      Barlyǵy jaqsy. Ekinshi aıqasqa úlken josparlar bar. Daıyndyqqa qyzý kirisip kettik. Sparrıngter bastaldy.

-      Revansh aldynda ózgertýdi nemese jaqsartqyń keletin tustar bar ma?

-      Kóp nárseni ózgertkim kelmeıdi. Sebebi men birinshi aıqasty jeńdim - men buǵan senimdimin. Osyǵan deıin «Kanelo» esh ýaqytta aınalshaqtap qashqan emes. Biraq birinshi jekpe-jegimizde ol Ýseın Bolt sııaqty júgirip júrdi! Múmkin oǵan ózgerý jaǵyn oılaný kerek shyǵar.

Qos boksshy arasyndaǵy alǵashqy jekpe-jek 2017 jyldyń 16 qyrkúıeginde Las-Vegasta ótken bolatyn. Ol tóreshilerdiń sheshimimen teń aıaqtaldy. Revansh aǵymdaǵy jyldyń 5 mamyryna belgilendi.

Eske salaıyq, naýryz aıynyń basynda Saýl Alvaresten alynǵan dopıng synamalardyń birinen tyıym salynǵan preparat tabyldy. Onyń múddesin qorǵaıtyn Golden Boy promoýterlik kompanııasy boksshynyń qan quramynan tyıym salynǵan preparat - Klenbýterol tabylǵany týraly aqparatty rastaǵan bolatyn.

Al keshe Golovkın dopıng daýynan keıin «Kaneloǵa» aıqasýǵa tyıym salynsa, kelesi jekpe-jegin kimmen ótkizetinin aıtty.