Gennadıı Golovkın «Kanelomen» 3-inshi jekpe-jegin resmı jarııalady

NUR-SULTAN. QazAqparat – Orta salmaq sanatyndaǵy álem chempıony, qazaqstandyq Gennadıı Golovkın ekinshi orta salmaqtaǵy álemniń absolıýttik chempıony Saýl Alvareske qarsy jekpe-jegin resmı túrde jarııalady, dep habarlaıdy QazAqparat.

«Resmı. 17 qyrkúıekte kezdeskenshe», - dep jazdy G.Golovkın Instagram-paraqshasynda.

Eske salaıyq, 2017 jyldyń qyrkúıeginde Golovkın men «Kanelo» kezdesýi teń aıaqtaldy.

Bir jyldan keıin, ıaǵnı 2018 jyldyń qyrkúıeginde S.Alvares tóreshiler sheshimimen Qazaqstan sportshysyn jeńdi.

Birer kún buryn meksıkalyq boksshy da Gennadıımen úshinshi aıqas ótkizetinin resmı málimdegen edi.

«Jaqyn kúnderi biz jekpe-jek týraly habarlaıtyn bolamyz. Árıne, Golovkınge qarsy jekpe-jek kelisilgendeı, qyrkúıek aıynda ótedi. Sonymen qatar sál keıin Bıvolmen de revansh ótkizemin», - degen bolatyn «Kanelo» baspasóz máslıhatynda.

Aıta keteıik, mamyr aıynyń basynda Saýl Alvares reseılik Dmıtrıı Bıvoldan jeńilip qaldy.

Al Gennadıı buǵan deıingi aıqasyn bıylǵy sáýirde japonııalyq Rıota Mýrataǵa qarsy ótkizip, 9-raýndta qarsylasyn nokaýtqa jiberdi.

Qazaqstandyq boksshy bıyl 40 jasqa toldy. Ony týǵan kúnimen el Prezıdenti Qasym-Jomart Toqaev quttyqtaǵan bolatyn.