General shenine ıe Mońǵolııa qazaǵy ataǵynan aıyryldy
Mońǵolııa prezıdentiniń Jarlyǵy Konstıtýtsııanyń 34-babynyń 1-tarmaqshasy, «Mońǵolııa Prezıdenti týraly» zańnyń 9-babynyń 1- tarmaqshasyna, «Áskerı qyzmet týraly» Zańnyń 28-babynyń 28.2-bólimine, «Mońǵolııa azamattyǵynan shyǵarý týraly» 2018 jylǵy 27 naýryzdaǵy №32 jarlyǵyna negizdelgen.
Osy jarlyqta: «Mońǵol eliniń azamattyǵynan shyqqan, Jekeı Qalıdoldaulyna berilgen joǵary ofıtserlik «Brıgada generaly» sheniniń kúshi joıylsyn», - delingen.
Jekeı Qalıdoldauly 1959 jyly Mońǵolııanyń Altantsógts aýylynda dúnıege kelgen - ulty qazaq, brıgada generaly (2007). Ol 1983 jyly Súhebaatar atyndaǵy Áskerı joǵary oqý ornyn, 1990 jyly Máskeý qalasynda Shekara áskerı mamandyq jetildirý kýrsyn, 1997 jyly Máskeý qalasy Shekaralyq áskerı basqarý akademııasyn bitirgen. 1983 jyly Mońǵolııanyń batys shekarasy «Bulǵyn» jasaǵyna qyzmetke taǵaıyndalady. Áskerı qyzmetin vzvod komandırliginen bastap, onshaqty jyl aralyǵynda kóshpeli top jetekshisi, shtabtyń daıyndyq bóliminiń bastyǵy, jasaq komandıri bolady. 2000 jyly áskerı ǵylym salasynda doktorlyq dıssertatsııasyn qorǵaıdy. Ol Baıan-Ólgeı aımaǵynan eki ret Mońǵolııa memleketiniń Uly Hýralyna (parlament - avt.) depýtat bolyp saılanǵan.
Jekeı Qalıdoldauly Mońǵolııanyń joǵary nagradalary «Altyn juldyz», «Maıdan dańqy» orden-medaldarymen marapattalǵan. Oǵan 2007 jyldyń 27 shildesinde Mońǵolııa Prezıdentiniń Jarlyǵymen brıgada generaly ataǵy berilgen bolatyn.
Aıta keterligi, Jekeı Qalıdollauly 2012 jyly Qazaqstanǵa qonys aýdardy. Mońǵolııa buqaralyq aqparat quraldarynda oǵan qarsy «memlekettik qupııany satty, tyńshylyq jasady» degen maǵynada maqalalar da jazyla bastaǵan bolatyn. Al Prezıdenttiń Jarlyǵynda «general sheninen aıyrý Mońǵolııa azamattyǵynan shyǵýyna baılanysty» dep kórsetilgen.
Jekeı Qalıdoldauly Mońǵolııa qazaqtary arasynan shyqqan úshinshi general edi. Munan buryn Dálelhan Súgirbaev, Zaısan Múdirisuly Mońǵolııa eliniń general shenin alǵan bolatyn.
Esterińizge sala keteıik, Áskerı qyzmet týraly zańnyń 28-babynyń 28.2- tarmaǵy boıynsha qylmys jasaǵan nemese sottalǵan jáne azamattyqtan shyqqan mońǵol azamattarynyń áskerı ataqtaryn shen berýshi laýazym ıesiniń sheshimi boıynsha qaıtaryp alynady.
Avtory: Qýat Ýathan