Genderlik teńdik salasynda Ortalyq Azııa bilim ortalyǵyn qurý turǵysynda jumystar júrip jatyr

NUR-SULTAN. QazAqparat – Shıelenisterdi boldyrmaý, beıbitshilik pen qaýipsizdikti nyǵaıtýda áıelderdiń qatysýyn keńeıtý boıynsha kúsh-jigerdi iske asyrýǵa qatysty Qazaqstan barsha halyqaralyq uıymdarmen jemisti yntymaqtastyqqa ázir. Bul týraly beıbitshilik pen qaýipsizdik máselesinde áıelderdiń róli taqyrybyna arnalǵan dóńgelek ústel otyrysynda QR Prezıdenti Ákimshiligi Basshysynyń orynbasary Aıda Balaeva aıtty, dep habarlaıdy QazAqparat tilshisi.

«Qazaqstan «Teń quqyly urpaq: áıelder quqyǵy men teń quqyly bolashaqty qorǵaý» jahandyq forýmy aıasynda qatysatyny týraly bastamany bildirip, zorlyq-zombylyq pen ekonomıkalyq ádiletsizdikti joıý boıynsha mindettemeni aldy», - dedi A. Balaeva QR Syrtqy ister mınıstrligindegi jıynda.

Sonymen qatar ol genderlik teńdik jáne quqyqtardy keńeıtý salasynda Ortalyq Azııa bilim ortalyǵyn qurý turǵysynda jumystar júrip jatqanyn jetkizdi. Ortalyq óz jumysynda Ortalyq Azııa elderimen seriktestik qatynastardy nyǵaıtýǵa, osy oraıda 2030 jylǵa deıingi ornyqty damý salasyndaǵy kún tártibin ilgeriletýdi qoldaýǵa baǵyttalǵan.

BUU Qaýipsizdik keńesiniń toǵyz qararyn iske asyrý maqsatynda Qazaqstan Úkimeti ótken jyldyń jeltoqsanynda 2025 jylǵa deıingi is-sharalar josparyn bekitti. Josparda shıelenisterdi boldyrmaýda, qaýipsizdikti qamtamasyz etýde, áıelderge qarsy zorlyq-zombylyqtyń aldyn alýda názik jandylardyń teń quqyly qatysýyna qatysty, sondaı-aq azamattyq qoǵammen ózara is-qımyldy ynǵaıtý turǵysynda naqty qadamdardy júrgizý qamtylǵan.

Budan buryn habarlanǵandaı, A. Balaeva Qazaqstanda qyzmettiń barlyq salasynda áıelderdiń jumysyn ilgeriletý turǵysynda tabysty kórsetkishterge qol jetkizilgenin aıtty.