GE Healthcare alańdarynda 6 myń qazaqstandyq maman oqytyldy

<p>ASTANA. KAZINFORM - Premer-mınıstr Oljas Bektenov jahandyq ınvestıtsııa jónindegi qazaqstandyq dóńgelek ústel aıasynda GE HealthCare óńirlik prezıdenti Kostas Delıgıannıspen kezdesý ótkizdi. Bul týraly Úkimettiń baspasóz qyzmeti habarlady.</p>

Memleket basshysy Qasym-Jomart Toqaevtyń qatysýymen qol qoıylǵan Qazaqstan aýmaǵynda GE HealthCare joǵary tehnologııalyq dıagnostıkalyq medıtsınalyq jabdyqtarynyń jańa óndirisin uıymdastyrý týraly kelisimdi júzege asyrý barysy qaraldy.

General Electric amerıkalyq transulttyq konglomeratynyń enshiles kásiporny GE HealthCare medıtsınalyq jabdyqtar, farmatsevtıkalyq preparattar óndirýde, sondaı-aq saladaǵy tsıfrlyq sheshimder men derekterdi taldaý júıelerin engizýde álemdik kóshbasshylardyń biri.

Kezdesýge qatysýshylar ozyq medıtsınalyq dıagnostıkalyq qural-jabdyqtar óndirisin lokalızatsııalaý máselelerin, Qazaqstanda óndiristik alań men klınıkalyq beınelerdiń ortalyqtandyrylǵan ulttyq muraǵatyn qurý josparlaryn talqylady. Lokalızatsııalaýdyń birinshi kezeńinde shyǵarylatyn jabdyqtar jelisin odan ári keńeıte otyryp, sońǵy býynnyń kompıýterlik tomograftary men ýltradybystyq dıagnostıka apparattaryn shyǵarý josparlanyp otyr. Medıtsınalyq beınelerdiń ortalyqtandyrylǵan muraǵaty patsıentterdiń medıtsınalyq derekteriniń qaýipsizdigin jáne durys saqtalýyn qamtamasyz etetin Biryńǵaı tsıfrlyq densaýlyq saqtaý keńistigin qurýǵa múmkindik beredi.

Oljas Bektenov Úkimet jumysy basym baǵyttarynyń biri qazaqstandyqtardyń qaýipsizdigi men densaýlyǵyn qamtamasyz etýge badarlanǵan sapaly, qoljetimdi ári zamanaýı medıtsınalyq ınfraqurylym qurý ekenin atap ótti. Densaýlyq saqtaý salasynda tsıfrlyq sheshimder engizýdiń, aýrýhanalardy jańǵyrtý men sapaly jabdyqtaýdyń, bilikti kadrlar daıarlaýdyń mańyzdylyǵy aıtyldy.

Óz kezeginde Kostas Delıgıannıs kompanııanyń qazaqstandyq naryqtaǵy qatysýyn keńeıtý josparlary týraly baıandady. Elimizdiń medıtsınalyq mekemeleri, sonyń ishinde jetekshi klınıkalar qazirdiń ózinde 3 myńnan astam GE Healthcare jabdyǵyn paıdalanady. Memlekettik onkologııalyq baǵdarlama aıasynda óńirlerde júzden astam mammograftar quryldy. GE Healthcare alańdarynda 6 myń qazaqstandyq maman oqytyldy.

Kezdesý qorytyndysy boıynsha taraptar elimizdiń densaýlyq saqtaý júıesin jetildirý aıasynda tyǵyz yntymaqtastyqqa nıetti ekenin rastady.