Ǵajaıyp tabıǵat: Jońǵar Alataýy ulttyq parkiniń qysqy kórinisi

NUR-SULTAN. QazAqparat - Ekologııa, geologııa jáne tabıǵı resýrstar mınıstrligi Jońǵar Alataýy ulttyq parkiniń qysqy sýretterin jarııalady, dep habarlaıdy QazAqparat.

Bul jaıynda vedomstvo Facebook paraqshasynda jazdy.

«Qysqy Jońǵar Alataýy ulttyq parkiniń ǵajaıyp tabıǵatyn birge tamashalaýǵa shaqyramyz. Ol Almaty oblysynyń Aqsý, Sarqan jáne Alakól aýdandarynyń aýmaǵynda ornalasqan. Qazaqstan tabıǵatynyń taǵy bir keremeti!» delingen Ekologııa mınıstrliginiń habarlamasynda.

Aıta keteıik, Jońǵar Alataýy — 2010 jyly qurylǵan memlekettik ulttyq tabıǵı park. Batystan shyǵysqa qaraı 300 shaqyrymǵa sozylǵan Jetisý Alataýy jotasynyń soltústik betkeıinde ornalasqan.

Park aýmaǵy - 356 022 gektar. Munda eń bıik shyń - teńiz deńgeıinen 4622 metr bıiktiktegi Semenov-Tıan-Shan shyńy.

Ulttyq parktiń negizgi maqsaty - tabıǵı taýly landshafty saqtaý jáne qalpyna keltirý. Parktiń faýnasy baı jáne sanalýan.

Munda sútqorektilerdiń 52 túri, qustardyń kem degende 238 túri, baýyrymen jorǵalaýshylardyń 8 túri, qosmekendilerdiń kem degende 2 túri kezdesedi.

Jońǵar Alataýy aýmaǵynda ornalasqan arheologııalyq eskertkishter erte temir dáýirine jatady.