Gazetterge jarnamany kóptep tartýǵa bolady - vıtse-mınıstr Ájibaev

ASTANA. QazAqparat - QR Aqparat jáne kommýnıkatsııalar vıtse-mınıstri Alan Ájibaevtyń oıynsha, búginde gazetter jarnamany tartý jaǵynan barlyq múmkindikterdi paıdalanbaı keledi, dep xabarlaıdy QazAqparat tilshisi.

«Máselen, gazetter praısty kórsetip, bir sharshy santımetrge 500 teńge alamyz deıdi. Túrli jeńildikterdi de usynady. Alaıda gazettiń ózin alyp qarasaq, jarnamanyń kólemi 10 paıyzdan da aspaıdy. Keı kezde ol jarnama múldem bolmaı qalady. Negizi, barynsha mobıldi bolý kerek. Jarnama berýshi úshin tıimdi usynystardy jasaý qajet», - dedi Ájibaev búgin Óńirlik BAQ forýmynda.
Vıtse-mınıstrdiń aıtýynsha, búginde gazetterdiń elektrondy nusqasy da bar ekenin umytpaý qajet. Ol arqyly oqyrman sanyn da, jarnamany da arttyrýǵa bolady. Máselen, álemge áıgili «Financial Times» gazetiniń tarylymy - 1 mln dana. Sonyń ishinde 200 myń oqyrman qaǵaz úlgisine jazylsa, qalǵany elektrondy nusqasyn oqıdy. «Osynyń ózi - qyrýar tabystyń kózi. Biz baıaǵy Qazposhta jaqtan oqyrmandardy kútip otyramyz», - dep atap kórsetti A.Ájibaev.
Aıta keteıik, búgin Astanadaǵy «Qazmedıa» ortalyǵynda óńirlik BAQ forýmy ashyldy. Sol jerde mınıstr Dáýren Abaev Óńirlik BAQ alıasynyń nemen aınalysatynyn aıtyp berdi.  Budan bólek, saıttardyń reıtıng úshin jumys istep jatqany da sóz boldy.