Gazet-jýrnal satatyn dúńgirshekter nege jabylyp jatyr
«Elimizde gazet-jýrnal satatyn dúńgirshekter (kıosk) nege jabylyp jatyr? Sebebi memlekettik qoldaý joq. Atalǵan salany qoldaý úshin, sýbsıdııa kerek. Onsyz másele sheshilmeıdi. Óıtkeni, gazet-jýrnal satatyn dúńgirshekterdiń (kıosk) shyǵyny kóp. Bul máseleni biz qaıta qarastyrýymyz kerek», - dedi Aqparat jáne qoǵamdyq damý vıtse-mınıstri Qanat Ysqaqov «Mass-medıa» týraly zań jobasyn talqylaý barysynda Májilis depýtattarynyń saýalyna jaýap bere turyp.
Aıta keteıik, búgin Májilis «Mass-medıa» týraly zań jobasy talqylandy. Onyń barysynda belgili bolǵandaı, otandyq BAQ salasynda baspasóz kartasy júıesi engizilmek.
Sondaı-aq, bıyl elimizde jýrnalısterdiń quqyǵy men bostandyǵy týraly ulttyq baıandama ázirlenedi.
Jıyn barysynda BAQ jáne tilshilerdi sotqa berý merzimi 3 jylǵa deıin qysqartylatyny aıtyldy.
Odan bólek, Májilis depýtaty BAQ ókilderine mártebe berip, turǵyn máselesin sheshý týraly oıyn ortaǵa saldy.