Gazben jylytý tarıfi 2021 jyldyń úshinshi toqsanynda belgilenedi - Qaraǵandy

QARAǴANDY. QazAqparat – 2021 jyldyń úshinshi toqsanynda gaz tarıfi anyqtalady. Bul alǵashqy iske qosý keshenderindegi barlyq jumystar ýaqytynda aıaqtalǵan jaǵdaıda múmkin bolady. Bul týraly jáne jalpy gazdandyrý jumystary jaıly Energetıka jáne TKSh basqarmasynyń basshysy Ulantaı Úsenov aıtty, dep habarlaıdy QazAqparat tilshisi.

Qaraǵandy oblysynda gazdandyrý jumystary belsendi júrgizilýde. Ótken jyly Jezqazǵanda, Talap aýylynda alǵashqy iske qosý kesheni aıaqtaldy.

«27 mamyrda «QazTransGaz Aımaq» AQ fılıaly bastaǵan jumys toby oqıǵa ornynda bolyp, qujattardy qarap, eskertýlermen tanysty. Temirtaýda alǵashqy iske qosý kesheni de aıaqtaldy, onda eskertýler joq, qujattar da zerdelendi. Qaraǵandy boıynsha alǵashqy iske qosý kesheni áli aıaqtalǵan joq – ony maýsymnyń sońyna deıin aıaqtaımyz dep úmittenemiz, sodan keıin jyldyń úshinshi toqsanynyń qorytyndysy boıynsha Qaraǵandy oblysy úshin tarıf bekitiletin bolady. «QazTransGaz Aımaq» AQ bizdiń óńir úshin biryńǵaı tarıf jasaǵysy keledi jáne ol Nur-Sultannan joǵary bolmaıdy dep úmittenemiz, al onda QQS - men 1 tekshe metr úshin 34,6 teńge esepteledi», - dedi Ulantaı Úsenov.

Budan basqa, Qaraǵandyda Mıhaılovka aýdanyna qaraı keshenderdiń ekinshi iske qosylýy bastaldy, Temirtaý men Jezqazǵanda da osy jyly gaz qubyrlaryn júrgizý boıynsha jumystar jalǵasady. Óńirde barlyq tutynýshylardy gazǵa qosý úshin tehnıkalyq múmkindikter bar.

- Oblysta kómir tutynýdy aıtarlyqtaı qysqartý bolmaıdy: jalpy oblys jylytý maýsymynda shamamen 13 mıllıon tonna kómir tutynady. Óńirge gaz jetkizýge keletin bolsaq, iske qosý keshenderi tolyq kúshine engen kezde, jalpy kólemi shamamen 1,4 mıllıard tekshe metr gazdy quraıtyn bolady – halyq úshin de, áleýmettik mádenı-turmystyq jáne bıznes obektileri úshin de. Sondaı-aq, «ArselorMıttal Temirtaý», «Qazaqmys» korporatsııasy» JShS ónerkásiptik kásiporyndaryn gazǵa kóshirý úshin tehnıkalyq múmkindikter bar. Bul esepteýlerge oblystyń qalalary men aýdandary – Qaraǵandy, Jezqazǵan, Temirtaý, Qarajal, Jáırem, Jańaarqa, Shet, Abaı, Buqar jyraý, Osakarov aýdandary kiredi. Jobalyq-smetalyq qujattama úsh qala – Qaraǵandy, Temirtaý jáne Jezqazǵan boıynsha ázirlendi. Osakarov, Jańaarqa aýdandaryndaǵy kentter, Shahtınsk jáne oǵan jaqyn ornalasqan eldi mekender úshin jobalar ázirlendi», - dep túsindirdi energetıka jáne TKSh basqarmasynyń basshysy.

Qaraǵandyny gazdandyrý jobasynda barlyǵy 16 iske qosý kesheni bar. Gaz taratý jelileriniń jalpy uzyndyǵy 1,1 myń km quraýy tıis, olardy salý quny 64 mlrd teńgege baǵalanady. Barlyq jumystardy aıaqtaýdyń sońǵy merzimi 2026 jylǵa belgilengen.