Gazben qamtý obektilerin tekserý: 12 nysannyń jumysy toqtatyldy

<p>ASTANA. KAZINFORM &ndash; 2024 jyly gazben jabdyqtaý obektilerine 40 márte tekserý júrgizip, tıisti talaptardy buzýdyń 479 deregi anyqtaldy. Bul týraly QR TJM Ónerkásiptik qaýipsizdik komıtetiniń tóraǵasynyń mindetin atqarýshy Rashıd Dýbaev aıtty.&nbsp;</p>

«2024 jyly ınspektorlar gazben jabdyqtaý obektilerine 40 tekserý júrgizip, 479 buzýshylyqty anyqtady. 12 ákimshilik quqyq buzýshylyq týraly is qozǵaldy, 12 nysannyń jumysy toqtatyldy. 2022-2023 jyldary 190-nan astam tekserý júrgizildi, 1 000-nan astam buzýshylyq anyqtalyp, 31 is qozǵaldy», - dedi ol OKQ alańynda. 

Spıkerdiń aıtýynsha, gaz júıelerin tıimdi jáne qaýipsiz paıdalaný úshin memleket tarapynan baqylaý ǵana emes, profılaktıkalyq is-sharalar men turaqty tekserýler júrgizý de mańyzdy. 

«Bıyl turǵyn aýdandarda 500-den astam aınalym uıymdastyryldy, ásirese erekshe nazar aýdarýdy qajet etetin áleýmettik ınfraqurylym men jeke úıler tekserildi. Sonymen qatar gazben jabdyqtaýshy uıymdardyń qatysýymen 80-nen astam keńes ótkizilip, áleýmettik jelilerde 800-den astam materıal jarııalandy», - dedi ol.

Sondaı-aq Rashıd Dýbaev baqylaýshy organdar mamandarynyń biliktiligi qaýipsizdikti qamtamasyz etýdiń negizgi faktory ekenin aıtty. 

«2021 jyldan 2024 jylǵa deıin biliktilikti arttyrý kýrstarynan turǵyn úı ınspektsııasynyń 296 ınspektory, al 2023 jyldan 2024 jylǵa deıin ónerkásiptik qaýipsizdik salasyndaǵy 80 ınspektor ótti. Sonymen qatar olardyń biliktiligin arttyrý jáne tájirıbe almasý úshin sheteldegi, atap aıtqanda Reseı men Belarýstegi tar baǵyttaǵy salalarda mamandardy oqytý men taǵylymdamadan ótkizýdi uıymdastyrý múmkindigi qarastyrylýda», - dedi Rashıd Dýbaev.

Buǵan deıin, maman gazben jabdyqtaý salasyndaǵy apattyń 70%-y gaz ballonynan bolatynyn aıtqan edi.