Gazadaǵy shaıqas ýshyqsa, Izraıl ıadrolyq qarý qoldana ma – Izraıl SІM ókiliniń jaýaby

<p>Izraıl Syrtqy ister mınıstrligi Eýrazııa jáne Balqan máseleleri jónindegi bas dırektorynyń orynbasary Sımona Galperın Astanadaǵy bırıfıngide Gaza shaıqasynda ıadrolyq qarý qoldaný yqtımaldyǵy týraly pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Izarıl HAMAS-pen shaıqas ýshyǵyp jatsa, ıadrolyq qarý qoldanýy múmkin degen málimetter shyǵyp jatyr. Shynymen de ıadrolyq soǵystyń tabaldyryǵynda turmyz ba?», - dep surady BAQ ókili.

Izraıl SІM ókili ol málimetti teriske shyǵardy.

«Jaı ǵana «joq» deý az bolatyn shyǵar. Eshqashan ondaı bolmaıdy. Ondaı sózdi aıtqan adam qazir memlekette otyrǵan joq... Premer-mınıstr de, onyń adamdary da... Bul óte aıqyn, týra jaýap dep oılaımyn. Izraıl halyqaralyq zań boıynsha jumys isteıtin el ekenin aıttym», - dedi Sımona Galperın.

Eske salsaq, Gaza sektoryndaǵy palestınalyq radıkaldar Izraıl aýmaǵyna zymyran atqylap, Izraıldiń ortalyǵy men ońtústiginde erekshe jaǵdaı engizilgen edi. 

Sońǵy málimet boıynsha, Izraıl áskeri Gazany tolyǵymen qorshap, ekige bólip tastaǵan. Syrtqy ister mınıstrliginiń málimeti boıynsha, Gaza sektorynda qazir Qazaqstannyń 76 azamaty bar. 

«Bizdiń derekterimiz boıynsha Gaza sektorynda Qazaqstan Respýblıkasynyń 76 azamaty bar. Otbasy múshelerimen qosa eseptegende olardyń sany – 161. Sonymen qatar sheteldik azamattardyń shyǵýyna baılanysty Mysyr jáne Izraıl tarapynan belgili talaptar bar. Olardyń úshten biri evakýatsııalaýǵa kelmeıdi. Olar – kámeletke tolǵandar, erli-zaıyptylar», - dedi mınıstrliktiń resmı ókili Aıbek Smadııarov mınıstrlikte ótken baspasóz máslıhatynda.