Gazadaǵy operatsııada qaza tapqan Izraıl áskeriniń sany 180-ge jetti

<p>Izraıl qorǵanys kúshteri (IDF) seısenbi kúni tańerteń qaza tapqan taǵy tórt sarbazdyń esimin atady, dep habarlaıdy QazAqparat agenttigi RIA Novostıǵa silteme jasap.</p>

«Izraıl qorǵanys kúshteri (IDF) seısenbi kúni tańerteń qaza tapqan tórt sarbazdyń esimin jarııalap, Gaza sektoryndaǵy qurlyq operatsııasy kezinde qaza tapqandardyń sany 180-ge jetkenin málimdedi», - delingen arna habarlamasynda.

Budan bólek, kem degende 7 jaraly sarbazdyń jaǵdaıy aýyr ekeni aıtyldy.

7 qazanda Palestınalyq Hamas qozǵalysynyń áskerı qanaty jarııalaǵan «Ál-Aqsa tasqyny» operatsııasynda Izraıl Gaza sektorynan buryn-sońdy bolmaǵan aýqymdy zymyrandyq shabýylǵa ushyrady. Osydan keıin uıym jaýyngerleri Izraıldiń ońtústigindegi shekaralyq aımaqtarǵa kirip, áskerılerge de, beıbit turǵyndarǵa da oq jaýdyrdy, sonymen qatar 200-den astam adamdy kepilge aldy.

Izraılde, sońǵy málimetter boıynsha 1,2 myńǵa jýyq adam qaza tapty, bul sanǵa beıbit turǵyndar, áskerıler, sheteldik azamattar men jumysshylar kiredi, sonymen qatar 5 myńnan astam turǵyn jaralanǵan.

Buǵan jaýap retinde Izraıl qorǵanys kúshteri Gaza sektorynda Hamasqa qarsy «Temir qylysh» operatsııasyn bastady. Birneshe kún ishinde ızraıldik áskerıler Gazamen shekaraǵa jaqyn ornalasqan barlyq eldi mekenderdi baqylaýǵa alyp, jolaqtaǵy nysandarǵa, sonyń ishinde beıbit turǵyndarǵa áýeden soqqy bere bastady.

Sondaı-aq, Izraıl Gaza sektoryn tolyq qorshaýǵa alǵanyn jarııalady: sý, azyq-túlik, elektr qýaty, dári-dármek jáne otyn jetkizý toqtatyldy.