Gazadaǵy qurbandar sany 37 myńnan asty

<p>ASTANA. KAZINFORM &ndash; 2023 jyldyń 7 qazanynan beri Izraıl armııasynyń Gaza sektoryndaǵy shabýyldary saldarynan qaza tapqan palestınalyqtardyń sany 37 myń 202 adamǵa jetti.</p>

Gazadaǵy Palestına densaýlyq saqtaý mınıstrliginiń málimetinshe, tek sońǵy 24 saǵattyń ishinde ızraıldik áskerıler 3 ret shabýyl jasaǵan, sonyń saldarynan 38 palestınalyq qaza taýyp, 100 adam jaralanǵan, dep jazady Anadolu.

Izraıldiń Gazaǵa 250 kúnnen astam jasaǵan shabýyldary saldarynan jaralanǵandardyń jalpy sany 84 932-ge jetti.

Qaza tapqandardyń deneleri áli qıraǵan ǵımarattardyń astynda, jol jıekterinde jatyr. Jedel járdem jáne azamattyq qorǵanys toptary Izraıl kúshteriniń kedergilerinen olarǵa jete almaı otyr.

Buǵan deıin Izraıldi genotsıdte aıyptaǵan Halyqaralyq sot Tel-Avıvten Izraıl shabýyldarynyń jalǵasýy saldarynan 1 mıllıonnan astam palestınalyq úılerin tastap, pana tapqan Rafahtaǵy shabýyldardy dereý toqtatýdy talap etken. 6 mamyrda Izraıl áskerıleri Rafahqa qurlyqtan shabýyl jasady.

Izraıldiń segiz aıdan astam ýaqytqa sozylǵan shabýyldary qorshaýdaǵy Gaza sektorynyń úlken bóligin qırandyǵa aınaldyrdy. Izraıl blokadasy saldarynan jergilikti halyq qıyn jaǵdaıda qalǵan. Ol jerde azyq-túlik, taza sý jáne dári-dármek tapshy.