Gazada qaza tapqan palestınalyqtardyń sany 38664-ǵa jetti

<p>ASTANA. KAZINFORM - Izraıldiń Gaza sektoryna jasaǵan soqqylarynan qaza tapqan palestınalyqtardyń sany 38664-ke deıin ósti. Bul týraly dúısenbide anklavtyń medıtsınalyq organdary habarlady,&nbsp; dep jazady <a href="https://russian.news.cn/20240716/ef7b5a66a20d464c87fca98f95096ea0/c.html" target="_blank" rel="noopener">Sınhýa.</a></p>

Málimdemede aıtylǵandaı, sońǵy 24 saǵat ishinde Izraıl áskerıleri 80 adamdy óltirip, 216 adamdy jaralady. Ótken qazanda qaqtyǵys bastalǵannan beri qaza tapqandardyń jalpy sany 38 664-ke jetti, 89 097 adam jaralandy.

«Ál-Kýds brıgadalary» («Islamdyq jıhad» qozǵalysynyń qarýly qanaty) músheleri Gaza sektorynyń ońtústigindegi Rafah qalasyndaǵy ıAbna bosqyndar lagerinde ızraıldik sarbazdar men áskerı kólikterdi mınometten atqanyn habarlady.

Izraıl qorǵanys armııasy Ál-Kýds brıgadalarynyń shabýylyna áli túsinik bergen joq. Dúısenbiniń basynda áskerıler Gaza sektory boıynsha operatsııalardy jalǵastyryp jatqanyn aıtty. Sońǵy kúni Izraıl áskerı-áýe kúshteri men Áskerı-teńiz kúshteri anklavta «Terrorıstik nysandarǵa» soqqy berip, qurlyq áskerlerine kómektesti.

Izraıl 2023 jyldyń 7 qazanynda eldiń ońtústik aımaqtaryna jasalǵan toptyń tosyn shabýylyna jaýap retinde Gaza sektorynda HAMAS-qa qarsy aýqymdy shabýyl jasady. Saldarynan 1200-ge jýyq adam qaza tapty, taǵy 250-den astamy kepilge alyndy.