Gaza sektorynda feldsherler qalaı jumys istep jatyr
Izraıl men HAMAS arasyndaǵy soǵys bastalǵannan keıin jergilikti jýrnalıst Feras ál-Ajramı jedel járdem brıgadasymen bir aı boıy birge boldy.
Feldsher Mahmýd ál-Masrı men onyń komandasynyń músheleri Gazanyń soltústigindegi Ál-Aýda aýrýhanasynda kezekti qońyraýdy kútti.
Qońyraý jergilikti ýaqyt boıynsha saǵat 14:00 shamasynda túsken.
Dıspetcher 5-15 jedel járdem kóligi soqqyǵa ushyraǵanyn habarlady. Onyń ishinde Mahmýdtyń ákesi feldsher Iosrı Ál-Masrı jumys istegen brıgada boldy.
Mahmýd jáne onyń áriptesteri ne bolǵanyn bilý úshin oqıǵa ornyna bardy.
Feldsherler oqıǵa ornyna jetkende, jedel járdem kóliginiń joldyń jıeginde jatqanyn kórdi. Ol ábden maıysqan metal bólshegine aınalǵan.
Mahmýd bólshekterge qaraı júgirdi. Onyń aıtýynsha, ishindegi barlyq nárse kesekterge bólinip, tolyǵymen órtenip ketken.
Onyń ákesi jáne Palestınanyń Qyzyl Krest qoǵamynyń taǵy eki qyzmetkeri qaıtys boldy.
«Onyń betinen túk qalmaǵan», — dep eske alady Mahmýd.
Bul jaǵdaı 11 qazanda, Izraıl men HAMAS arasyndaǵy soǵys bastalǵannan bes kún ótkende boldy.
Ákesi qaıtys bolǵannan keıin úsh balasy bar 29 jastaǵy Mahmýd eki apta demalys aldy.
Biraq, óziniń aıtýynsha, qaıǵysyna qaramastan ol jumysyna qaıta oralǵan.
«Palestına halqyna qyzmet etý — meniń mindetim», — deıdi ol.
Mahmýd jeti jyldan beri feldsher bolyp jumys isteıdi. Ol Gaza sektorynyń soltústigindegi Djabalııa qalasyndaǵy Palestına Qyzyl Jarty Aı Qoǵamy komandasynyń múshesi.
VVS-diń Arab qyzmeti túsirgen fılmde ásirese oqqa ushqan sábılerdiń denesin kóterip kele jatqan feldsherlerdiń emotsıonaldy kúıi anyq kórsetilgen.
Soǵystyń alǵashqy kúnderinde feldsher Ramı Hamıs jedel járdem kóligin aıdap kele jatyp, kózine jas aldy.
Ol qulaǵan úıdiń astynda qalyp qoıǵan adamdarǵa shaqyrylǵanyn aıtty. Ondaǵy zardap shekkenderdiń kóbi áıelder men balalar.
Ol úıdiń bir bólmesinen úsh qyzdyń denesin taýyp aldy, kóz aldyna óziniń úsh qyzy keldi.
«Men sol jerde ózime ıe bola almadym. Mundaı kórinisti kórgende kózińe eriksiz jas keledi», — dedi Ramı.
Onyń jylap turǵan vıdeosy ınternet jelisinde keń tarap ketti.
Qazan aıynyń sońynda feldsherler tobynyń basqa múshesi Alaa Ál-Halabıge týysy qońyraý shaldy.
Alaanyń aıtýynsha, aǵasynyń úıi eki kún buryn Izraıl áýe shabýylynan qıraǵan, biraq qaza tapqandardyń kóbi áli úıindi astynda.
Týysqan aǵasynyń denesi áldeqashan shyǵarylǵan, ol ony aýrýhanaǵa jetkizemin dep úmittendi.
Alaa bir top adam opyrylyp qulaǵan beton úıindisin jyljytpaq bolǵan tar qýysqa kirgende, týystarynyń biri ol jerde kishkentaı qyzdyń denesi jatqanyn aıtty.
Alaa kidirip, tereń tynys alǵan soń (bet-álpetin medıtsınalyq maskanyń artyna jartylaı jasyryp qoıǵan) sózin jalǵastyrdy:
«Munda qyzdyń denesiniń bólshekteri bar».
Sol kúni Alaa janyp ketken bes balanyń denesin tapty. Polıetılen paketke salynǵan úsh máıit aýrýhanaǵa jetkizildi, Alaa protsesti jiti qadaǵalady.
«Óli balalardyń denesin kóterip turǵanda óz balańdy kóterip turǵandaı sezimde bolasyń» deıdi ol.
Soǵys bastalǵannan keıin bir apta buryn Izraıl Gaza sektorynyń soltústigindegi beıbit turǵyndarǵa ózderiniń qaýipsizdigi úshin anklavtyń ońtústigine kóshýge buıryq berdi, sondyqtan feldsherlerdiń otbasylarynyń kópshiligi evakýatsııalandy.
Jedel járdem qyzmetkerleri Gazanyń soltústiginde qaldy. Olar telefon nemese PRCS radıo jelisi arqyly áıelderimen jáne balalarymen úzilissiz baılanysta boldy.
Sondaı-aq, Alaa ketkende balalarynyń jylaǵanyn, jol boıynda Alladan aman-saý qaıtyp oralýyn surap, únemi duǵa etkenin aıtty.
PRCS qyzmetkerleri men volonterleri qaýip pen qaterdiń bel ortasynda júrdi.
Birneshe feldsher Al-Aýda aýrýhanasynyń syrtynda kólikte bolǵan kezde, jaqyn jerde jarylys bolyp, olar jasyrynýǵa májbúr boldy.
Kem degende eki jedel járdem kóligi zaqymdandy.
Palestına Qyzyl Jarty Aı qoǵamynyń málimetinshe, 7 qazannan beri Gazada uıymda jumys isteıtin 14 feldsher qaza tapqan.
«Árbir shaqyrtý bizdiń komanda músheleriniń ómirine qaýip tóndiredi», — dedi Qyzyl Jarty Aı ókili Nebal Farsah BBC-ge bergen suhbatynda qaza bolǵan qyzmetkerleriniń tizimin kórsetip.