Gaza sektorynan shyǵarylǵan qazaqstandyqtar Kaırden ushaqpen elge jetkiziledi - Aıbek Smadııarov

<p>Gaza sektorynan shyǵarylǵan Qazaqstan azamattary Kaırden bir ushaqpen jetkizilýi múmkin. Bul týraly Syrtqy ister mınıstrliginiń resmı ókili Aıbek Smadııarov aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Buǵan deıin aıtqanymyzdaı, Gaza sektorynda 76 azamatymyz bar. Olardyń otbasy múshelerin qosa alǵanda — 161 adam. Biraq tsıfr ózgerip turady. Bul tizimdegi keıbir adam evakýatsııa krıterııine kirmeıdi. Aıtalyq, bizge esh qatysy joq Palestına azamaty tizimde bar bolyp shyqty. Ony Izraıldiń de, Gaza sektorynyń da, Mysyrdyń da bıligi tekseredi. Sondyqtan bıýrokratııalyq, dıplomatııalyq jaǵdaı bolyp tur. Munyń ústine Kaırden Rafakqa deıin jetý de biraz ýaqytty alady. Kóptegen blokpostar bar, olar ótken barlyq kólikti tekseredi», — dedi Aıbek Smadııarov mınıstrlikten ótken aptalyq brıfıngte.

Onyń aıtýynsha, otandastarymyz Kaırǵa jetkizilgennen keıin olardy ushaqpen Qazaqstanǵa ákelý josparlanǵan.

«Biraq ázirge Gaza sektorynan 44 adamdy ǵana shyǵaramyz. Kaırdan jetkizýdiń basqa da joldaryn qarastyramyz. Gaza sektorynda qalyp qoıǵan qalǵan adamdardyń shyǵarylýyn kútip, bárin bir ushaqpen alyp kelemiz. Bolmasa bólek-bólek elge jetkizemiz. Bul mańyzdy emes. Bizdiń basty mindetimiz — azamattarymyzdy Gaza sektorynan shyǵarý», — dedi SІM ókili.

Búgin Qazaqstan Gaza sektoryndaǵy azamattaryn evakýatsııalaý protsesin bastaǵanyn jazǵan edik.