Gaza sektorynan ákelingen qazaqstandyqtardyń bala-shaǵasy bosqyn mártebesin ala ma

<p>Syrtqy ister mınıstriniń birinshi orynbasary Qaırat Omarov Palestınanyń Gaza sektorynan ákelingen Qazaqstan azamattarynyń bala-shaǵasyna qandaı mártebe beriletinin aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Ol adamdar bosqyn ataný úshin Qazaqstannyń tıisti memlekettik organdaryna ótinish jazýy kerek. Sol ótinish boıynsha komıssııa jumys istep, olardyń mártebesin anyqtaıdy. Qazirgi tańda olar - jaı ǵana evakýatsııalanǵandar. Qazaqstanda týysy barlar týystarynyń úıinde. Týysy joq azamattarymyzǵa ýaqytsha baspana berildi. Ári qaraı mártebesin, basqa da máselelerdi anyqtaımyz», - dedi mınıstrdiń birinshi orynbasary.

Sonyń sózinshe, Gazadan ákelingen balalar qazaqstandyqtarǵa usynylatyn áleýmettik qyzmetterdiń bárin kedergisiz alady.

«Árıne, bul jumysqa adamdardyń úlken shoǵyry jumyldyrylǵan. Qazaqstan aýmaǵyna kelgen kezde birinshi kezekte medıtsınalyq kómek kórsetildi. Qajet bolsa ári qaraı da kómek kórsetiledi. Qazaqstan tólqujaty barlar Qazaqstan azamaty ekeni túsinikti. Al olardyń otbasy músheleri Eńbek jáne halyqty áleýmettik qorǵaý mınıstrlikterinen «mártebe berý» týraly ótinim rásimdedi. Meniń túsinýimshe, Qazaqstan azamattarynyń otbasy múshesi retinde belgili bir artyqshylyqtary (ózge sheteldikterge qaraǵanda – red.) bolady. Onyń bárin jiliktep aıta almaımyn. Zańnamadan qarap bilýlerińizge bolady», - dedi Qaırat Omarov.