Gaza men Izraıl bir-birin zymyranmen atqylap jatyr

NUR-SULTAN. QazAqparat – Palestınalyq «Islamdyq jıhad» sodyrlary Gaza sektoryndaǵy áskerı operatsııasyn bastaǵannan beri Izraılge qaraı 380-nen astam zymyran atqylaǵan. Bul týraly QazAqparat euronews aqparat agenttigine silteme jasap habarlaıdy.

Senbi keshinde Tel-Avıv pen eldiń ortalyǵyna qaraı 12 zymyran atyldy, onyń ekeýi teńizge qulady. Jıhadshylar ózderiniń shabýyldaryn kek alý áreketi dep atady.

Izraıl armııasy ıslamdyq jıhadtyń Gazadaǵy boljamdy nysandaryna áýe shabýyldaryn jalǵastyrýda. Bul rette ol Gazadaǵy bıleýshi HAMAS qozǵalysymen ashyq qaqtyǵysqa túspeı otyr.
«Biz lańkesterdiń Gazadan Izraılge zymyrandar men dáldikpen basqarylatyn snarıadtardy ushyrý josparyn júzege asyrýyna jol bermedik jáne bul josparyn áli de buzatyn bolamyz. Biz «Islamdyq jıhadtyń zymyrandaryn jasap, ushyrý úshin paıdalanǵan ondaǵan nysandarǵa soqqy berdik», - dedi Izraıldiń qorǵanys mınıstri Bennı Gants.

Halqy tyǵyz ornalasqan Gaza sektorynda zymyrynan beıbit turǵyndar kóz jumýda. Aldyn ala málimet boıynsha, áýeden jasalǵan soqqylardan 15 adam qaza tapty, onyń ishinde 5 jasar qyz bala bar. 125 palestınalyq azamat jaraqat aldy.
Izraıl aqparat quraldarynyń habarlaýynsha, jıhadshylar elge atqylaǵan zymyrandardyń 95%-yna «Temir kúmbez» áýe qorǵanys júıesi tótep bere aldy.
Izraıldiń áskerı operatsııasy bir aptaǵa sozylatyny kútilýde.

Eske salsaq, Izraıl qorǵanys kúshteri Gaza sektoryndaǵy ıslamshyl nysandarǵa áýeden soqqy jasady. Taıaý Shyǵystaǵy jaǵdaı ýshyǵa tústi. Sonymen qatar BUU-nyń ókili Taıaý Shyǵystaǵy jaǵdaıǵa alańdaýshylyq bildirdi.

Foto: news.cn