Gavaı araldarynda qutqarý jáne qalpyna keltirý jumystary júrip jatyr

VAShINGTON. QazAqparat – Gavaı araldaryndaǵy kúrdeli qutqarý jáne qalpyna keltirý jumystary týraly AQSh tótenshe jaǵdaılar jónindegi federaldyq agnettiginiń (FEMA) basshysy Dınna Krısýell aıtty, dep habarlaıdy QazAqparat menshikti tilishisi.

Baıden ákimshiligi búkil úkimettiń kúsh-jigerin Maýıdegi órtke jumyldyrdy.

Amerıkalyq sheneýnik araldaǵy jaǵdaı kúrdeli ekenin, FEMA izdeý-qutqarý qyzmetteri jergilikti bılik organdarymen tyǵyz baılanysta jumys istep jatqanyn atap ótti.

Tabıǵı apattyń saldaryn joıýǵa 700-den astam adam jiberildi, olardyń 600-den astamy aralda.

Apat aımaǵyna amerıkalyq Qyzyl Krest jáne «United Way» eriktiler uıymy medıtsınalyq kómek kórsetý, azyq-túlik, sý, gıgıenalyq zattar jáne basqa da qajettiliktermen qamtamasyz etý úshin eki brıgada jiberdi.

Zardap shekken aýdandarda joǵalǵan adamdardy anyqtaý úshin júzdegen izdeý-qutqarý bólimshesine qosymsha 40-qa jýyq kınologııalyq izdeý toby tartyldy.

AQSh bıligi zardap shekkenderge 2,3 mıllıon dollar kóleminde kómek bóldi jáne kómek alý úshin 1300-den astam ótinishti maquldady.

Tiri qalǵandar úshin qıyn jaǵdaılarda qarjylyq qoldaý kórsetý jáne ýaqytsha turǵyn úımen qamtamasyz etý jónindegi baǵdarlama iske qosyldy. Zardap shekkenderdi tirkeý FEMA-da veb-saıt arqyly (DisasterAssistance.gov) jáne telefon arqyly (1-800-621-3362) júzege asyrylady.

Densaýlyq saqtaý jáne áleýmettik qyzmet mınıstrliginen 30 patologoanatom mamany Maýıde júr. Olarǵa taıaý ýaqytta qaza tapqandardyń kim ekenin anyqtaýǵa kómek kórsetý úshin AQSh Qorǵanys mınıstrliginen sarapshylar qosylady.

Qorshaǵan ortany qorǵaý agenttigi men AQSh áskeriniń ınjenerlik korpýsy zardap shekken aýdandardyń aýmaǵyn tazalaý boıynsha jumystar uıymdastyrady.

Gavaı araldaryndaǵy jaǵdaı AQSh prezıdenti Djo Baıdenniń baqylaýynda. Oǵan qutqarý jáne qalpyna keltirý jumystarynyń barysy týraly únemi baıandama jasap jatyr.