Ǵaryshta birinshi qazaq tili boldy

ASTANA. 8 qazan. QazAqparat - Adamzat tarıhynda birinshi jasandy jer serigin ushyrýǵa baılanysty BUU Bas Assambleıasynyń 54/68 qararyna sáıkes, 1999 jyldyń 6 qazanynan bastap qazannyń 4-10 aralyǵyndaǵy apta búkilálemdik ǵarysh aptasy dep belgilengen bolatyn. Ondaǵy maqsat - adamzat jaǵdaıyn jaqsartý úshin ǵarysh ǵylymy men tehnıkasynyń qosatyn úlesin atap ótý. Bul týraly Qazǵaryshtyń baspasóz qyzmetinen habarlady.

Qazaqstan bul datamen tek «Baıqońyr» ǵarysh aılaǵyn baılanystyryp qana qoımaıdy, sonymen qatar, birinshi spýtnıkten bastap, árbir ǵarysh apparattyń ishine mynadaı mazmundaǵy jazba salynyp otyrǵan: «Joldastar! Myna paketti kim tapsa, jaqyn jerdegi jergilikti sovetke tabys etilsin». Osylaısha qazaq tili (orys tilimen teń deńgeıde) ǵaryshta birinshi boldy.

Nelikten spýtnıkter osyndaı málimetteri bar pakettermen qamtamasyz etildi? Sebebi kapsýla josparǵa saı belgilengen orynǵa qonbaýy da múmkin edi. Jáne onyń qazaqtyń dalasynda bolǵanyn eskersek, kapsýlalarǵa izdeýshilerden buryn aýyl turǵyndarynyń biri birinshi bolyp jetýi, onyń qazaq ańshysy nemese malshysy bolýy ǵajap emes. Shalǵaıda jatqan aýyldyń turǵyny oryssha túsinbeýi múmkin bolǵandyqtan, qazaq tilindegi jazba da birge salynǵan. Aǵylshyn, frantsýz, qytaı, japon jáne barlyq basqa tilder ǵaryshta keıin bolǵandyǵyn faktiler kórsetip otyr. Ǵarysh tarıhynan osyndaı este qalarlyq jaıt qazaq tili ǵaryshta birinshi boldy dep aıtýǵa negiz bola alady.