Ǵaryshkerler mingen kapsýla Qazaqstan jerine qondy

ASTANA. QazAqparat - Búgin, 2017 jylǵy 14 jeltoqsan kúni, Astana ýaqytymen 14 saǵat 38 mınýtta «Soıýz MS-05» basqarylatyn kólik kemesiniń jerge qonýǵa arnalǵan kapsýlasy Qazaqstan aýmaǵyna qondy, dep habarlaıdy «QazAqparat» HAA tilshisi.

«Roskosmos» óziniń online.roscosmos.ru saıtynda qoný ornynan tikeleı translıatsııa júrgizdi. Orbıtadaǵy 139 táýliktik jumystan keıin halyqaralyq ǵarysh stansasynyń 52-shi jáne 53-shi uzaq merzimdi ekspedıtsııasynyń músheleri - «Roskosmos» kosmonavty Sergeı Rıazanskıı, NASA astronavty Rendolf Breznık jáne Eýropa ǵarysh agenttiginiń astronavty Paolo Nespolı jerge oraldy.

 «Soıýz MS-05» ekıpajy 2017 jylǵy 29 shildeden beri HǴS-da boldy. Ekıpaj músheleri stansada ǵylymı-qoldanbaly zertteýler men eksperımentter ótkizdi, HǴS-nyń jumysqa qabilettigi bolýyn qamtamasyz etti, oǵan júk tasymaldaýshy ǵarysh kemeleri aparǵan qondyrǵylardy ornatty.

Kapsýlanyń jerge qonýy shtattyq rejımde iske asyryldy. Kúshti jel turýyna baılanysty ǵaryshkerlermen kezdesý rásimi qysqa bolatyny habarlandy. Dál qazir ǵaryshkerler turǵan jerden translıatsııa júrgizilip jatyr.

Sergeı Rıazanskıı men Rendolf Breznık osymen ekinshi ǵarysh saparyn aıaqtady, al EǴA astronavty úshin bul ekspedıtsııa úshinshi bolyp otyr.

Aıta ketelik, buryn habarlaǵanymyzdaı, Paolo Nespolıdiń bastamasymen jýyrda HǴS-da tańǵajaıyp eksperıment júrgizildi - ǵaryshkerler salmaqsyzdyq jaǵdaıynda alǵash ret ıtalıandyq pıtstsa ázirlep kórgen bolatyn.