Ǵaryshker-synaýshy Aıdyn Aıymbetovke mereıtoılyq medal tabys etildi

ASTANA.  28 tamyz. QazAqparat -  Búgin Ulttyq ǵarysh agenttiginde Qazaqstan Respýblıkasy Konstıtýtsııasynyń qabyldanǵanyna 17 jyl tolýyna oraı saltanatty jınalyp bolyp ótti.

Qazǵaryshtyń baspasóz qyzmetiniń máliminshe, saltanatty is-shara barysynda vedomstvo basshysy Talǵat Musabaev Qazǵarysh ujymyn osy aıtýly merekemen quttyqtap, Qazaqstannyń árbir azamaty óz Otanynyń keleshegi úshin, Konstıtýtsııa qaǵıdalarynyń saqtalýy úshin jaýapkershilikti sezinýi tıis ekendigin atap kórsetti.

Jıynda Qazaqstan Respýblıkasy Ulttyq ǵarysh agenttigi Ákimshilik-qarjy departamentiniń dırektory T. Sháripov Ata Zańnyń negizgi baǵyttary týraly baıandama jasady. Sonymen qatar, memlekettik mereke qarsańynda qyzmetke jańadan qabyldanǵan memlekettik qyzmetshilerdiń Qazaqstan Respýblıkasy memlekettik qyzmetshisiniń Antyn qabyldaý rásimi ótti. Óz eńbek joldaryn memlekettik organnan bastap otyrǵan jas mamandar úshin búgingi kún erekshe saltanatty boldy.

«Saltanatty jınalys sońynda Qazǵarysh tóraǵasy eren eńbegimen aıryqsha kózge túsken qyzmetkerlerdi «Qazaqstan Respýblıkasynyń táýelsizdigine 20 jyl» medalimen marapattady. Sondaı-aq, ǵaryshker-synaýshy, polkovnık Aıdyn Aıymbetovke «Qazaqstan Respýblıkasynyń Qarýly Kúshterine 20 jyl» mereıtoılyq medalin tabys etti», - delingen bul málimetterde.

Aıta keteıik, Aıdyn Aıymbetov aldaǵy ýaqytta Qazaqstan atynan ǵaryshqa ushatyndardyń qatarynda.