Ǵaryshker ataný úshin úlken eńbekqorlyq kerek - A. Aıymbetov (FOTO)
"Ǵaryshkerler qataryna qosylý úshin eń aldymen densaýlyq myqty bolý shart. Ekinshi keregi - joǵary bilim. Sonan soń eńbekqorlyq qajet", - dep atap ótti ol.
Onyń oıynsha, ǵaryshkerlerdiń boıynda álemdi tanýǵa degen qushtarlyq, jiger jáne qarapaıymdylyq bolýy kerek.
"Men Qazaqstan Prezıdentiniń qolynan joǵary nagrada alǵan kezde men ózime Otan úshin, eldiń órkendeýi úshin barlyq ómirimdi sarp etemin dep ýáde ettim. Men joǵary nagradaǵa ıe boldym, biraq men sol baıaǵy Aıdyn bolyp qaldym, ózgermeıtin de shyǵarmyn, men jaı ǵana óz qyzmetimdi atqaryp, elimizdiń ǵarysh salasyn kórkeıtý jolynda eńbek ete beretin bolamyn", - deıdi ol.
Sonymen qatar ol oqýshylar aldynda qazaqstandyq ǵaryshkerler qalaı daıyndalatyndaryn aıtty.
"Biz ǵaryshkerler otrıadynda daıyndaldyq. 2012 jyldyń 12 qazanynda maǵan Qazaqstan Respýblıkasynyń ǵaryshkeri mártebesi berildi. Bizdiń ǵaryshkerlerimizdiń sany tutas bir otrıad bolǵanyn qalar edim", - dep eske alady ol.
A. Aıymbetov eger múmkindik bolsa, ekspedıtsııa quramynda taǵy birneshe márte ǵaryshqa attanǵysy keletindigin de jasyrmady.
"Qazaqstannyń ǵaryshqa adamdy ushyrý tájirıbesi óziniń damýyn ári qaraı jalǵastyra bermek. Kelesi joly meniń ushýym yqtımal, múmkin ózge bireý tańdalar. Bolashaqta jańadan otrıad qurylýy da ǵajap emes", - deıdi ǵaryshker.
"Balańyzdyń ǵaryshker mamandyǵyn tańdaǵanyna qalaı qaraısyz?" degen saýalǵa A. Aıymbetov: Ol ushqysh bolǵandy ózi qalady. Keıin ǵaryshkerler otrıadyna da túse jatar. Olardyń kez kelgen tańdaýlaryn men qabyldaýǵa daıarmyn, qolymnan kelgeninshe qoldaımyn jáne men ony ózderine aıttym", - dep atap ótti.
Eske sala keteıik, qazaqstandyq ǵaryshkerdiń Halyqaralyq ǵarysh stansasyna 2015 jyldyń 2 qyrkúıeginde ushty. Ol «Soıýz TMA-18M» zymyranynyń bort-ınjeneri qyzmetin atqardy. Sonymen qatar ǵaryshta Qazaqstannyń besinshi ǵylymı zertteýlerin júrgizgen bolatyn.
Qazaqstandyqtyń ǵaryshta ótkizgen ýaqyty - 9 táýlik, 20 saǵat, 13 mınýt 51 sekýnd.
Ǵarysh keńistigin ıgerýge sińirgen asa zor eńbegi, ǵaryshqa ushý kezinde kórsetken batyrlyǵy men erligi úshin Qazaqstan Respýblıkasynyń ǵaryshkeri Aıdyn Aqanuly Aıymbetovke «Halyq qaharmany» ataǵy berilip, aıryqsha erekshelik belgisi - Altyn Juldyz ben «Otan» ordeni tapsyryldy.