Ǵaryshker Alekseı Leonov qaıtys boldy

MÁSKEÝ. QazAqparat – Tarıhta birinshi bolyp ashyq ǵaryshqa shyqqan adam, eki márte Keńes Odaǵynyń batyry Alekseı Leonov 86 jasynda Máskeýde kóz jumdy, dep habarlaıdy QazAqparat TASS agenttigine silteme jasap.

Bul jóninde juma kúni onyń kómekshisi Natalıa Fılımonova málim etti.

«Alekseı Arhıpovıch uzaq ýaqyt syrqattanyp, Býrdenko atyndaǵy gospıtalde kóz jumdy», - dedi Fılımonova.

Onyń aıtýynsha, ǵaryshkermen qoshtasý jáne janazasy 15 qazan kúni Federaldyq áskerı memorıaldyq zıratynda ótedi (Mytışı, Máskeý oblysy).

Alekseı Leonov eki márte ǵaryshqa ushqan. Jalpy ushý ýaqyty - 7 táýlik 33 mınýt. Sondaı-aq, ol - ashyq ǵaryshqa shyqqan álemdegi tuńǵysh ǵaryshker (jalpy ýaqyty – 23 mınýt 41 sekýnd, 12 mınýt 9 sekýnd – kemeden tys).

Ol alǵash ret ǵaryshqa 1965 jyly 18-19 naýryzda ushyp, «Voshod-2» kemesiniń ekinshi ushqyshy bolǵan. 18 naýryz kúni ashyq ǵaryshqa shyqty. Ushý barysynda shtattan tys jaǵdaılar oryn alǵan. Qysymdaǵy aıyrmashylyqqa baılanysty skafandr isip ketken. Bul ǵaryshkerdiń shlıýz kamerasyna qaıtýyna kedergi keltirdi (esiktiń dıametri óte kishkentaı bolǵan).

1967-1970 jyldary Leonov Aıǵa ushýǵa daıyndalǵan ǵaryshkerler tobyn basqardy. Aı baǵdarlamasy jabylǵan soń «Uzaq merzimdi orbıtalyq stansa» baǵdarlamasy boıynsha daıyndyqtan ótkenmen, alǵashqy «Salıýt» stansasyna ushqan joq.