Ǵarysh stansasynda aýa qysymy tómendep ketti

ASTANA. QazAqparat - 2018 jylǵy 30 tamyzda Halyqaralyq ǵarysh stansasynyń jaǵdaıyn qoǵamdyq baqylaý quraldary orbıtadaǵy stansanyń ishinde aýa qysymynyń azaıǵanyn tirkedi, dep habarlaıdy «QazAqparat» HAA tilshisi Roskosmostyń baspasóz qyzmetine silteme jasap.

«Roskosmos» memlekettik korporatsııasy, «Energııa» ZǴK,  Mashınaajsaý ortalyq ǵylymı-zertteý ınstıtýty mamandarynan oqys jaǵdaıdy tekserý jónindegi arnaıy komıssııa jasaqtaldy.

Buryn stansa ekıpajy modýlderdiń barlyǵyn tekserip, «Soıýz MS-09» basqarylatyn kólik kemesiniń turmystyq bóliginde usaq sańylaýdy anyqtady. Qazir aqaýdy retteý boıynsha jumystar júrip jatyr. Ekıpaj ómiri men densaýlyǵyna eshqandaı qaýip-qater joq, delingen habarlamada.

«Roskosmos» bas dırektory Dmıtrıı Rogozın búgin Twitter-degi paraqshasynda HǴS germetızatsııalaýdyń aıaqtalatynyn málimdedi. Onyń aıtýynsha, on eki saǵattan keıin qaıta tekseriledi.

Eske sala keteıik, Halyqaralyq ǵarysh stansasynda reseılik ǵaryshkerler Oleg Artemev, Sergeı Prokopevten, amerıkalyq Endrıý Feıstel, Rıchard Arnold, Serena Aýnon-Chensellor jáne nemis ǵaryshkeri Aleksandr Gerstten quralǵan eki ekıpaj bar.