«Ǵarysh qyzmeti týraly» zań qabyldandy - Parlament
Qujat Memleket basshysynyń qol qoıýyna jiberiledi.
Atalǵan qujat boıynsha ǵarysh qyzmetin júzege asyrýdyń qaǵıdattary, ǵarysh qyzmetin uıymdastyrýdyń, júzege asyrýdyń jáne damytýdyń negizgi baǵyttary aıqyndalady. Sonymen qatar, qujatta ǵarysh qyzmeti salasyn memlekettik retteý jáne baqylaý maqsatynda QR Úkimeti men ǵarysh qyzmeti salasyndaǵy ýákiletti organnyń quzyreti belgilenedi. Ǵarysh nysandaryn jáne olarǵa quqyqtardy memlekettik tirkeýdiń tártibi aıqyndalady. Bul rette ǵarysh qyzmetin júzege asyrý úshin zań arqyly ǵarysh qyzmeti salasyndaǵy qyzmetti lıtsenzııalaý, ǵarysh qyzmeti salasyndaǵy ǵylymı zertteýler júrgizý, ǵarysh júıeleri men ǵarysh zymyran keshenderin jasaý jáne paıdalaný kózdeledi. Budan bólek, ǵarysh qyzmetiniń qaýipsizdigin qamtamasyz etý jónindegi quqyqtyq normalardy júıeleý kózdeledi, ǵaryshkerlikke kandıdattyń, ǵaryshkerdiń quqyqtyq jaǵdaıy jáne olardy áleýmettik qamsyzdandyrý sharalary qamtylady.
Jıyn barysynda qujat týraly baıandaǵan QR Ulttyq ǵarysh agenttiginiń tóraǵasy Talǵat Musabaev ǵarysh qyzmetiniń strategııalyq damý baǵyttary Údemeli ındýstrııalyq-ınnovatsııalyq damytýdyń memlekettik baǵdarlamasyna engizilgenin atap ótti. Onda ǵarysh salasyna qatysty eldiń Indýstrııalandyrý kartasyna engen tórt iri jobany oryndaý kózdeledi. «Birinshisi - «QazSat» baılanys jáne aqparat taratý júıesin qurý, ekinshisi - jerdi qashyqtyqtan zondtaýdyń ǵaryshtyq júıesin qurý, úshinshiden - «Baıqońyr» ǵarysh aılaǵynda Báıterek ǵarysh-zymyran keshinin qurý, tórtinshiden - ǵarysh apparattaryn qurastyrý-synaý keshenin qurý. Bul jobalardy sátti júzege asyrý úshin ǵarysh qyzmetin ǵylymı jáne ǵylymı-tehnologııalyq bazasyn damytýdyń mańyzy zor. Budan bólek, kadr áleýetin damytý, halyqaralyq yntymaqtastyqty arttyrý, ǵarysh salasynyń tıisti kelisimdi-quqyqtyq jáne normatıvtik tehnıkalyq bazasyn jasaý kózdeledi», - dedi T. Musabaev.